Tuai raban bansa, JKKK dikeandal nyaup ngetanka penyerakup bansa
SIBU: Opis Menteri Pemansang Menua Pesisir enggau Kandang Menua (KKLW) ngelempaika ngagai bala tuai raban bansa enggau Komiti Pengelikun enggau Pemansang Genturung Pendiau (JKKK) megai tanggungpengawa ngetanka penyerakup ba mensia mayuh ke dipegai sida.
Ketuai Sekretari KKLW Datuk Borhan Dollah madah, kebuah pia laban sida tu lebih agi besemak enggau mensia mayuh ba menua diri.
“Kitai meda maya hari tu macham bengkah pengawa enggau ulah bisi nyadi dikena mambarka penyerakup ba bansa.
“Nya alai, piak KKLW andal bala tuai raban bansa enggau JKKK tauka tuai rumah lengkas nemu nama bagi pengawa tauka ulah ti tau ngeruga pengelikun penyerakup ba rayat ke dipegai sida.
“Ketegal nya, kitai ngarapka sida tu nyadika tikas pemadu tinggi ngembing mensia mayuh ngagai penyerakup,” pia ku iya madah.
Iya mantaika jaku tu maya ngarika Sapit Menteri KKLW Datuk Alexander Nanta Linggi maya Pengawa Nutup Program Sijil Tadbir Urus Desa INFRA-UniKL, Zon Sarawak di sebengkah hotel tebilang ditu, kemari.
Pengawa nya dipenyadi Menteri Pemansik Sains enggau Teknologi Dr Annuar Rapa’ee.
Bela datai iya nya Kaban Kunsil Nengeri ( ADUN) Dudong Datuk Tiong Thai King, ADUN Bukit Goram Jefferson Jamit, ADUN Pelagus Wilson Nyabong enggau Direkter Institur Kemajuan Desa (INFRA) Dato Rubiyah Abdul Rahman.
Kelimpah ari nya, Borhan mega ngarapka bala tuai raban bansa enggau tuai rumah landik nyeliahka pekara ke enda manah nyadi ba menua sida ngambika pengelikun mensia mayuh semampai ulih diintu.
Nya alai, ku iya, piak sida andalka kursus ke diatur nya ulih nyungkakka agi pengelandik raban nya ngintu pengerakup mensia mayuh.
Iya mega madah, KKLW megai tanggungpengawa deka mai polisi enggau tuju perintah ti ngemeratka pengidup rayat ngagai semua rayat di menua pesisir.
“KKLW ngembuan tuju deka ngembing bala tuai raban bansa enggau tuai rumah nyentuk datai ba tikas ti ulih mai menua ke dipegai likun nitihka juluk ati perintah.
“Semua tu bepanggai ba pelin ti manah ba menua diri empu,” ku iya madah baru.
Program Sijil Tadbir Urus Desa siti program latih besetipikit ungkup JKKK lalu di Sarawak program tu diungkupka ngagai tuai raban bansa enggau tuai rumah.
Kemari program tu digulu 456 iku penyereta ari Kapit, Song enggau Bukit Mabong ti udah belabuh ari 22 nyentuk 24 Mach lalu kenyau ke digaga taun 2017 nyentuk Mac taun tu, sepenyampau 1,542 iku penyereta ngambi bagi nengah empat siri kus nyengkaum Kuching, Sri Aman, Miri enggau Mukah.
Program tu inisiatis dikena ngeringka agi tanggungpengawa megai menua ari baruh Teras Ke-14 Pelan Transformasi Luar Bandar KKLW.
KKLW nengah Institut Kemajuan Desa ( INFRA) deka mengkah chakah bejadika program tu lalu deka nentuka semua 17,419 JKKK, Jawatankuasa Kemajuan dan Keselamatan Kampung Persekutuan (JKKKP) enggau Jawatankuasa Kemajuan dan Keselamatan Kampung Orang Asli (JKKKOA) serata menua bela ngambi bagi ba program nengah chara berenggat.
Nyentuk ke diatu mega, sepenyampau 6,438 iku JKKK/JKKKP enggau JKKKOA udah mujur ngambi bagi ba program tu.