PRU14 : PBB dipelaba nyabung abis nadai tiga iku chalun baru
KUCHING: Parti Pesaka Bumiputera Bersatu (PBB) dipelaba deka nyabung abis nadai tiga iku orang baru maya Pengawa Bepilih Besai Ke-14 (PRU14) ti deka datai.
Nitih ku orang dalam parti, chalun baru deka bediri minta pilih di Puncak Borneo, Betong enggau Mukah.
Penyandang ba tiga penuduk nya iya nya Datuk Seri Dr James Dawos Mamit, Datuk Amar Douglas Uggah enggau Dato’ Sri Dr Muhammad Leo Michael Toyad Abdullah.
Orang dalam nya madahka Dawos, ke nyadi Sapit Menteri Kuasa Karan, Teknologi Gadung enggau Ai, udah ngenukuka diri enda dipilih baru ketegal pengerai seraya Uggah udah nyebut sebedau tu ke alai iya enda deka ngetanka penuduk parlimen iya.
Uggah diatu nyadi Sapit Kepala Menteri, nyilih penuduk ex- Sapit Kepala Menteri Datuk Patinggi Tan Sri Dr Alfred Jabu Numpang pengudah Pengawa Bepilih Nengeri (PRN) 7 Mei 2016.
Lebuh PRN nya, exMenteri Kebun Dandang Besai enggau Komoditi Malaysia, bediri minta pilih sereta menang di Bukit Saban.
Taja pia, orang dalam nya enggai nerang silik pasal isu di Mukah.
Ku iya, nyangka meda bisi sekeda ‘surprise’ lis chalun dalam PBB.
Ditanya nama reti jaku ‘surprise’ ti disebut iya nya, ku iya nimbal, bisi siku tauka dua iku penyandang ti patut ditingkil, tang nyangka deka diperunding baru sereta dipasukka baru dalam lis,” ku iya.
Taja pia, iya nyalamka nama sida nya.
Ditanya sekalika iya nemu sapa bagi orang baru, ku iya, semina Kepala Menteri aja nemu.
Bejaku pasal peluang Tan Sri William Mawan deka dichalunka baru, ku iya, endang baka enda deka nyadi seagi iya dalam PBB laban polisi parti iya nya nadai siku kaban kunsil nengeri deka bediri minta pilih ba pengawa bepilih parlimen.
Barisan Nasional ( BN) diatu megai 25 ari 31 penuduk parlimen di Sarawak sereta lebih ari sebagi nya, tauka 14 iti, dipegai PBB.
Kelimpah ari Puncak Borneo, Betong enggau Mukah, penuduk parlimen bikai ke diatu dipegai PBB iya nya Santubong, Petra Jaya, Kota Smarahan, Batang Sadong, Batang Lupar, Tanjoing Manis, Igan, Kapit, Sibuti, Limbang enggau Lawas.