Projek ngaga DCCI Tower, DCF Tower enggau dua blok kondominium dikearap ulih mujur
KUCHING: Balai Dagang enggai Industri Dayak (DCCI) deka ngaga begunan opis semilan ringkat tauka DCCI Tower di sebidang tanah diagihka ngagai sida ari perintah nengeri di Jalai Ong Tiang Swee ditu.
Presiden iya, Datuk Joseph Salang Gandum madahka projek pemansang begulai deka dikemansang begulai enggau Dayak Cultural Foundation (DCF), ti mega deka bisi begunan iya empu di lot tambah ke mega diagihka perintah nengeri.
Ku iya nerang, pengawa ngaga deka dipejalai raban profesional, mega deka ngaul pengawa ngaga dua blok kondominium, sebuah begunan peninggi empat ringkat lalu sebuah agi begunan peninggi semilan ringkat, kesemua iya manggai 122 unit deka dijual ngagai mensia mayuh.
Pengudah iya tembu, projek tu deka meda dua begunan diberi nama DCCI Tower enggau DCF Tower, dua buah blok kondominium bela diempu DCCI enggau DCF.
“Rambau aum besai ninting taun DCCI, kami sepenemu mantaika sekeda resolusyen, ke alai antara iya dikena meri terima kasih enggau ngenang jasa Kepala Menteri Datuk Patinggi Abang Johari Tun Openg enggau Sapit Kepala Menteri Datuk Amar Douglas Uggah Embas ti udah ngagaihka tanah tu ngagai DCCI.
“Kami deka ngaga DCCI Tower enggau atur pejalai dokumentasyen blok kondominium udah tembu. Kami mega merambu nyual unit kondominium, enggau sekeda unit di begunan, ngagai mensia mayuh,” ku iya madah ngagai pengarang berita pengudah iya ngetuaika Aum Besai Ninting Taun (AGM) Ke-16 DCCI di sebengkah hotel ditu, kemari.
Abang Johari, lebuh bejadika pengerami makai lemai Gawai Dayak renggat nengeri kena 17 Jun taun nyin tadi, udah ngemendarka kededua DCCI enggau DCF bela deka diberi sebidang tanah di Jalai Ong Tiang Swee ditu dikena ngemesaika aktiviti sida.
DCF enggau DCCI diperati suba udah kala minta sebidang tanah nengeri ari ketuai dulu ari Abang Johari, ba niang Datuk Patinggi Tan Sri Adenan Satem.
Rambau AGM nya, ku Salang, udah digulu bala kaban DCCI ti datai ari jauh baka Sibu, Bintulu, Miri sereta mega Kuala Lumpur.
Ku iya, resolusyen bukai ti dibantai iya nya sukung ngagai Kepala Menteri enggau perintah nengeri ba penetap penemu ngelepaska kuasa ari perintah besai, sereta mega minta pulai baru hak nengeri tu udah lenyau di baruh Sempekat Malaysia 1963 (MA63).
Ku iya nambah, bala sida mega udah netapka diri meri sukung ngagai resolusyen ti dikemendar dalam Konferen Bala Ketuai Komuniti ba Pekara Pemakai Menua enggau Pulai Galau diatur kena 24 enggau 25 Januari, ngambika perintah nengeri bejalaika atur ti patut dikena nyaga hak peranak asal ba pekara tanah Adat Bansa Asal (NCR).
Sama bisi datai ngulu AGM iya nya Penyanding Penemu DCCI Tan Sri Datuk Amar Leo Moggie, Tan Sri Datuk Amar Leonard Linggi, Sapit Presiden Kilat Beriak, Sekretari Besai Libat Langub, Tukang Wang Allan Keripin, Mandal Presiden Christopher Gira sereta bala kaban kunsil supreme ke bukai.
DCCI, ti udah ditumbuh sereta direjista kena 11 Januari 2003, diatu udah manggai 900 iku kaban.