Kerejasama UPP, SUPP ngenegap BN Sarawak

MIRI: Kerejasama entara Parti Rakyat Bersatu ( UPP) enggau Parti Sa’ati Rayat Sarawak ( SUPP) ukai semina beguna amat tang mega ke penyerakup komuniti China sereta mantu ngenegapka Barisan Nasional ( BN).

Chairman UPP Pujut, Bruce Chai madah Kepala Menteri Datuk Patinggi Abang Johari Tun Abang Openg udah bejalaika pengawa enggau manah nyadi Chairman BN Sarawak nyerakupka kededua parti nya.

“Iya ( Abang Johari) diberi mandat nyerakupka kededua parti. Ba penemu aku, tu endang chara pemadu manah. Kitai meri terima kasih ngagai Kepala Menteri bekau ari lalau iya,” ku iya lebuh nimbal pemaik Sempekat Pemereti Ati ( MoU) entara SUPP enggau UPP ke disain ba Kuching ensana.

Kenu ku Bruce, nengah atur baru tu UPP deka terus meri sukung ngagai parti komponen BN dikena nentuka ulih menang besai ba Pengawa Bepilih Besai Ke-14 (PRU14) ila.

Iya madah, pemujur UPP enggau SUPP ba penuduk ti diarika chalun mega beguna amat dikena nyerakupka baru kededua parti.

“Udah pengawa bepilih besai, nyema UPP, SUPP menang mayuh penuduk nya deka mantu atur nyerakupka kededua parti,” ku iya.

Bekaul enggau chalun, nyema chalun ke dipilih UPP dipilih, chalun nya patut dibaruh payung SUPP ke nyadi komponen BN.

Pekara ke disetuju tu deka ngiarka bida enggau laya entara kededua parti nya ngelama tu.

MoU nya nadai agi nyebut bekaul enggau chalun ti patut tang lebih ngagai sapa bagi chalun ke ulih tang lebih fokus ngagai chalun ke ulih menang.

“Kepala Menteri deka UPP enggau SUPP ngiarka bida ke penegap penyerakup rayat ba Sarawak sereta kededua parti.

“Ketua Menteri mega deka BN Sarawak kering lalu nengah penyeraky UPP enggau SUPP kitai ulih nyapai juluk nya,” ku Bruce.

Iya madah, MoU nya ukai semina semaya puang tang pemungkal ngagai sebengkah pekara baru ungkup komuniti China ari kededua parti dalam nyapai penyerakup enggau pengering.