Terenak ulah ngemeranka penemu ba nembiak dikena nangkup dunya kereja

KUCHING: Nerenak ulah ngemeranka penemu ba raban nembiak politeknik tau nyikap sida nangkup dunya pengereja pengawa ke nyengala pengudah apus belajar, ku Chairman Kaunsil Penyanding Penemu Industri Politeknik Kuching Sarawak (PKS), Datuk Abdul Karim Abdullah.

Iya madah nyikap nembiak ngambika penuh penuh tau ngemuntangka sida ngembuan ulah ke pintar sereta liat ati.

“Seriris enggau juluk opis menteri pelajar ke deka ngenegapka Pelajar Teknikal enggau Latih Vokasional (TVET), aku melaba nengah program projek enggau inovasyen ke diatur, iya ulih ngenegapka agi pengelandik nembiak nempa sesebengkah utai ke manah nengah buah penemu ke badas.

“Nengah pengawa nempa sesebengkah utai ti kreatif sereta inovasyen aku mega meragam nya deka matak penatai bala pengemeran industri mantaika produk ditempa nembiak ngambika dijual ngagai makit besai, kelimpah meri pemaik ngagai bala nembiak enggau OKS empu,” ku iya.

Iya ke mega Ketuai Direktor Eksekutif Gerup Serba Dinamik Holding Berhad madah munyi nya ngagai Bernama pengudah dirandau maya nutup enggau nyuaka perais Festival Eksibisyen Projek enggau Inovasi ba Politeknik Kuching, apin lama ke udah.

Abdul Karim madah, naka tu bisi 19 bansa produk ke digaga PKS lebih bisi penau dikerembai lalu diatu ba tikas digagaka paten sereta direjister nengah projek ke tau mansang.

“Tu mandangka PKS setanding enggau palan pelajar TVET ke bukai, kelimpah mandangka PKS mujur nyapai status tikas lima bintang. Nya mih entara kriteria dikedeka kami,” ku iya.

Urung 12 gerup nembiak ari kus Injinir Sivil, Injinir Elektirk, Injinir Mekanikal, Injinir Petrokimia enggau kus Matematik, Sains enggau Komputer bisi ngambi bagi ba program nya. — Bernama