Enti sida ngembuan ulah nya baru rumah panjai sida deka mansang
SRI AMAN: Bala ketuai raban bansa di pelilih menua tu patut kreatif, chakah, inovatif sereta pintar ngemansangka genturung pendiau enggau rumah panjai ke dijaga diri.
Sapit Menteri Dalam Menua, Datuk Masir Kujat madah, enti sema ketuai raban bansa bisi ngembuan ulah ke bansa nya baru genturung pendiau tauka rumah panjai sida deka mansang lalu pulaika penguntung nembiak redak sida.
“Perintah deka meda pengudah tu, sida ti megai tanggungpengawa nyadi ketuai ngatur pengawa di rumah panjai enggau genturung pendiau nukar chara sida gawa ngambika kreatif agi seriris pemansang kemaya hari.
“Tinggalka chara ke lama lalu tukar ngagai ke kreatif enggau inovatif agi ngambi nguntungka semua raban kelebih agi nembiak redak kita,” ku iya.
Iya mansutka jaku nya lebuh bejaku bejadika Program Pemesai Begulai Enggau Rayat di Rumah Nili Lajon, Kampung Muding Jaong UUlu, Sebuyau semak ditu, kemari.
Ku Masir nambah, ketuai ngatur pengawa patut panjai runding sereta suah ngemai nembiak redak iya baum lalu sedia mendingka penemu sida pulaika pemansang begulai.
“Enti sema bisi bala ketuai raban bansa kitai ngembuan ulah ke bansa tu, tentu pekara diperambu ungkup pemansang genturung pendiau enggau rumah panjai
Tinggalka chara ke lama lalu tukar ngagai ke kreatif enggau inovatif agi ngambi nguntungka semua raban kelebih agi nembiak redak kita. Datuk Masir Kujat Sapit Menteri Dalam Menua
deka bisi asil,” ku iya.
Berebak enggau nya, Masir mega nangkan bala ketuai raban bansa nyediaka profile genturung pendiau sida nyadika chuan penerang dudi hari.
“Pengawa nyediaka profile genturung pendiau beguna endar laban tetiap chuan penerang rumah panjai enggau genturung pendiau patut dipasuk dalam profile nya.
“Profile tu ukai semina nyadika lalau peranak dia empu, tang mega raban ejensi perintah bukai baka Opis Residen, Opis Pelilih sereta ejensi perintah ke bukai ti suah begunaka dokumen nya,” ku iya madah nyemetak.
Nya alai ku iya, iya minta ejensi perintah ti bekaul begunaka profile genturung pendiau bela nurun gawa besaup enggau ketuai raban bansa nembuka profile di baruh pegai sida.
Sama bisi datai Menteri Muda Nembiak enggau Lumba Sarawak ke mega Kaban Kunsil Nengeri ( ADUN) Balai Ringin, Datuk Snowdan Lawan sereta bala ketuai raban bansa ke bukai.
Nyerumba program nya, Masir mega bisi ngemendarka agih belanja penyampau RM100,000 dikena nyeleti jalai ngelawa Rumah Nili seraya Komiti Pemansang Enggau Pengelikun Genturung Pendiau (JKKK) enggau Biro Indu beka nerima agih belanja penyampau RM10,000 enggau RM5,000 ungkup taun 2018.