Gerempung Teksi Sarawak ngakun kurang mereti pasal program bantu ari perintah
KUCHING: Gempung Gerempung Orang Bempu Teksi Sarawak ngakun kurang meretika atur e-hailing nyengkaum program bantu ke disedia Perintah ungkup orang deriba teksi di nengeri tu.
Sekretari gempung nya Robert Angkah madah pekara nya pia ketegal mayuh kaban gerempung tauka driba teksi enda nerima penerang sentang inisiatif perintah nya.
Ketegal nya ku iya, mayuh sida ngembuan runding ke enda manah ba sentang pengawa ke digaga perintah.
“Engka kitai salah sangka ketegal penerang ke silik enda dikenatai ngagai kitai ke nyadi driba teksi di nengeri tu.
“Baka ke bantu meli teksi baru ke nyadi inisiatif perintah nengah Program Ubah Industri Teksi ( TITP) ti nyendia geran RM5,000 ngagai driba teksi, mayuh kitai enda nemu sentang pekara tu,’ku iya.
Iya mansutka jaku nya lebuh dikerandau pengudah ngulu Wokshop Ubah Indus- tri Teksi ke diatur Lembaga Pelesenan Kenderaan Perdagangan (LPKP) di seiti hotel ditu, kemari.
Berindik enggau nya, Robert ngarap mayuh agi wokshop ke sama diatur ngambi ulih nyadung penerang ngagai orang driba teksi di nengeri tu.
Ngenang sentang ubah industri teksi ke dipejalaika perintah, iya ngarap program nya deka meri empas ba penatai pemisi driba teksi.
“Kitai enda ulih nyeliah ubah lalu ba tetiap pekara baru, sigi bisi pemar.
“Ketegal nya kitai ngarap driba teksi liat ati nempuh pemar ke datai,’ku iya.
Robert mega bisi merambu ngambika perintah nyendia insentif tauka bantu ‘one-off’ penyampau RM500 ngagai driba teksi.