Rejista pengada anak ulih nyeliah penanggul status peranak menua
MIRI: Apai indai di menua pesisir patut ngerejista pengada bala anak sida dikena nyeliahka penanggul status peranak menua.
Menteri Muda Dagang Temuai, Seni enggau Main Asal, Datuk Lee Kim Shin madah bisi sekeda bala anak nadai besekula ketegal nadai ngembuan surat pengada tauka tingki.
“Kitai chukup sinu ngagai bala nembiak mit ti ada di Sarawak nadai ngembuan surat pengada lalu nanggul sida tu besekula,” ku iya ditu, kemari.
Kaban Kunsil Nengeri (ADUN) Senadin nya mapdahka apai indai di menua pesisir patut sedar pemesai guna ngembuan dokumen pengelala diri ti meruan.
“Enti nadai surat pengada tauka tingki, bala anak enda ulih besekula sereta mega hak sida ngulihka bantu deka mar,” ku iya nerang.
Dulu agi ari nya, Lee udah nyuaka surat pengada enggau tingki ngagai 19 iku penerima ari sitak DUN Senadin.
Bala sida tu datai ari peminta beumur antara 13 ngagai 55 taun ti ada di menua pesisir tang udah mindah lalu bekereja di mengeri.
Lee madahka perintah mega udah bebendar gawa mutarka penanggul buta urup ngagai peranak menua pesisir.
“Aku deka nguji mai penanggul nembiak mit nadai be- sekula tu ngagai Opis Pelajar Nengeri ngambika sida mega diberi peluang besekula,” ku iya.
Berebak enggau nya, iya ngelalau apai tauka indai ti ngembuan status peranak Malaysia ngambika ngerejista anak sida pengudah iya ada.
“Enti siku ari indai tauka apai peranak Malaysia, ke alai anak ti baru ada endang patut nerima status peranak Malaysia,” ku iya nerang.
Sama bisi datai Ketuai Unit Khas Mindah Kin Kitu ( UKB) Opis Pengerejista Bansa (JPN), Affrizan Bujang enggau Ketuai Operasyen Biro Aduan Awam SUPP Miri, Erick Chin Fen Siong.