Penanggul ditapi komuniti ke nadai status peranak nengeri patut teputar

MIRI: Semua penanggul ti nuntung bala komuniti nadai ngembuan status peranak nengeri, patut diputar lalu anang nyadika nya semina lakun politik aja, jalai dikena nginti ngundi ketegal pengawa bepilih besai ke nyau majak semak.

Ulah beduan rayat dikena beambi ulih ba politik endang ulah ti enda manah, pia ku Sekretari Raban Pemikir Dayak ( DTTG) Pampang Miri, Eva Bayang.

“Endang enda patut nasit komuniti nadai ngembuan status peranak nengeri digintir ngambika nerima pemendar ari parti politik megai perintah, seraya bala bukai diteju sereta napi atur pejalai birokrasyen betaun pengelama.

“Bala sida tu bisi kaul nyata sereta peminta sida patut dipending, ada di Malaysia, abis nadai apai indai peranak Malaysia, idup diau di Malaysia, lalu nadai sebarang kaul enggau menua ke bukai,” ku Eva.

Nasit ti enda manah sereta penekul ngelui ari pengulih sida, nadai ngembuan status peranak Malaysia udah nanggul sida ari ngembuan hak enggau peluang nitihka pematut nyadi peranak Malaysia, ku iya madah.

“Kitai enda ulih mulaika hak sida ti lenyau ngelama tu, tang kami ulih nentuka sida badu agi napi sebarang penusah lebih ari pematut.

“Pemuntan Opis Pengerejista Bansa ( JPN) meseti diteju, patut ngerumban pemint ke bisi. Ungkup timpuh panjai, sebengkah pengawa patut seruran dipejalai dikena ngelala sapa bagi orang ti nadai ngembuan status peranak nengeri lalu kes sida tu diatur enggau adil agi,” ku Eva.

Eva nyemetak madah penanggul peranak nadai ngembuan status peranak nengeri pekara ti chukup ngemaruhka nama menua, tang iya enda patut seruran baka nya.

“Meseti bisi ubah – pekara ti patut iya nya politik deka bisi ubah dalam polisi, ngagai peranak menua ti enda dibalut politik, sereta ngagai JPN, berengkah gawa enggau lurus, nyadi peranak Malaysia, ukai peranak menua luar,” ku iya nambah.