Industri betanam betupi deka terus dikemansang chara moden Tu deka nyaup ngurangka impot ba pekara pemakai ari menua luar
LUNDU: Perintah Nengeri deka chakah agi ngadu pengawa ke dikearap ulih ngemansang industri betanam betupi nengah chara moden.
Kepala Menteri Datuk Patinggi Abang Johari Tun Openg pechaya pemujur ba pekara nya deka nyaup ngurangka impot nengeri tu ba pekara pemakai ari menua luar.
Ku iya, Sarawak melanja urung RM3 bilion ninting taun dikena mayar impot pemakai ari menua luar ngambi ulih nangkup pinta ba barang pemakai di nengeri tu.
“Kitai bisi mayuh tanah lalu patut berundingka chara ke ulih nyaup ngerembaika pengawa betanam betupi.
“Enti nitih, kitai patut nyadi pemansut pemakai lalu nyual ngagai menua luar laban kitai mayuh tanah,”ku iya rambau bejadi MAHA 2018 ke diatur di Waterfront Lundu ditu, kemari.
Dikena nentuka juluk nya dijapai, Abang Johari madah perintah deka nyendia perengka guna ke patut ke ulih nyaup industri nya.
Iya nambah, Sarawak nengah opis menteri betanam betupi merambu beranakka puku RM10 juta dikena meli seiti bilun ‘kargo’ ngambi tau dikena nganjung asil betanam betupi enggau pemakai nengeri ke menua luar.
“Nengah bilun ‘kargo’ tu kitai ulih nyual asil betanam betupi terus ngagai Singapura enggau menua bukai.
“Puku ke diperanak tu nyadi sebengkah chara perintah nengeri mantu orang bekebun betupi kitai,”ku iya.
Nambahka nya ku Abang Johari, perintah mega merambu ngaga palan penyangkai bilun di Sadok enggau Tunoh ngambi ulih ngambi asil betanam betupi ari kandang endur nya lalu dijual ngagai makit luar enggau lengkas.
Ungkup makit Singapura ti dekaka sayur, iya madah perintah nengeri deka muka opis di menua nya lalu deka dikunsi enggau opis dagang temuai. Opis nya disadang ngepunka operasyen ba bulan Januari 2019.
“Perintah nengeri keran ngadu ubah ba pengawa betanam betupi nengah teknologi baru.
“Enti semua perambu ke udah ditusun dipejalai enggau lanchar, Sarawak deka nyadi nengeri pemansut pemakai ke pemadu besai manggai taun 2030,”tandu Abang Johari.
MAHA 2018 seiti program ke diatur Opis Menteri Betanam Betupi enggau Industri Asas Tani enggau tuju ngerapitka kaul begulai enggau orang betanam betupi di nengeri tu.
Ba program nya kemari, Abang Johari bisi nyuaka geran ‘In Kind Contribution (IKC)’ penyampau RM2.247 juta ngagai 138 iku penerima ti ngarika mayuh bengkah
Enti nitih, kitai patut nyadi pemansut pemakai lalu nyual ngagai menua luar laban kitai mayuh tanah. Datuk Patinggi Abang Johari Tun Openg Kepala Menteri Sarawak
industri betanam betupi.
Bela datai Sapit Kepala Menteri ke mega Menteri Betanam Betupi Moden, Tanah Adat enggau Pemansang Kandang Menua Datuk Amar Douglas Uggah, Menteri Pengereaja Asal enggau Rampa Menua Dato Sri Wan Junaidi Tuanku Jaafar enggau Sapit Menteri Betanam Betupi enggau Industri Pengawa Bumai Malaysia Dato Anthony Nogeh.