Lebih 60 peratus pengawa puang baru begunaka raban landik TVET

SERIAN: Perintah bisi tagit nyendia urung 1.5 juta pengawa puang baru manggai taun 2020 lalu lebih 60 peratus ari penyampau nya begunaka pemandai ba Pelajar enggau Latih Teknikal enggau Vokasional (TVET), ku Menteri Pengereja Pengawa, Datuk Seri Richard Riot Jaem.

Pekara tu kenu ku Riot, nempa TVET nyadi pelasar pemadu beguna dikena nambahka pekereja landik enggau tagit sepenyampau 35 peratus pekereja landik datai ba taun 2020.

Nya kebuah ku iya, perintah di baruh pegai Menteri Besai Datuk Seri Mohd Najib Tun Razak udah meri pemerat besai TVET ke alai dalam bulan September nyin tadi iya bisi ngemendarka Opis Menteri Pengereja Pengawa udah dipadu nyadi penyebela atur pengawa ngagai TVET Malaysia ti ngaul tujuh opis menteri.

“TVET kemaya hari diperati nyadi antara bidang ti bisi semekih,” ku iya rambau aum pengarang berita pengudah bejadika pengawa nasih tanah projek Institut Latihan Perindustrian Serian (ILPS) ditu, kemari.

Ku iya, ngagai graduet bidang TVET pengelain peluang kereja nadai tatak ungkup graduet TVET bekereja makai gaji aja, tang sida ti pas TVET mega diperansang ngaul diri ba pengawa dagang ti mega dikelala ngena nama ‘digital technopreneur’, iya nya pedagang ba bidang digital enggau teknikal.

Nitih ku Riot, naka diatu, penyampau peratus pengereja bepengelandik tinggi menua iya nya 28 peratus aja enggau tagit nempa 35 peratus datai ba taun 2020.

Berindik ari nya, iya ngelalau raban nembiak belajarka bidang pengelandik ngambi muntang diterima di makit kereja.

Ngelansa pasal pengawa ngaga ILP Serian, ku Riot, iya deka digaga di atas taba 56.76 ekar pemesai di Kampung Tenggak, Serian enggau kesemua belanja manggai RM300 juta.

Ku Riot, pengawa ngaga iya deka berengkah dalam bulan Mei taun tu lalu deka tembu dalam timpuh 33 bulan, lalu deka berengkah gawa dalam taun 2021, sereta ulih nampung 600 iku pelatih ba siti timpuh.

Iya nyadi ILP ti keempat di Sarawak pengudah ILP Miri, ILP Kota Samarahan enggau ILP Bintulu, lalu nyadi ILP ti ke-24 sereta Institut Latihan Jabatan Tenaga Manusia (ILJTM) ke-33 ke alai deka ngemeranka konsep enggau kus belalauka peminta di menua nya.

Kus ti deka disedia baka Kus Teknologi Penyejukbekuan dan penyaman udara, Teknologi Automotif, Teknologi Kimpalan, Teknologi Merangka enggau Mereka Bentuk nengah bantu komputer Computer ( CADD) mekanikal ungkup minyak enggau gis sereta kuss teknologi pengawa berumah (begunan). — Bernama