Nogeh pechaya Sarawak ulih nyadi pemansut pemakai pemadu besai jemah ila
LUNDU: Tembu projek Jalai Besai Pan Borneo jemah, Sarawak deka nyadi nengeri pemansut pemakai ke pemadu besai, ku Sapit Menteri Betanam Betupi enggau Industri Asas Tani Malaysia Dato Anthony Nogeh.
Bejaku ba pengerami MAHA 2018 di Waterfront Lundu kemari, iya pechaya juluk nya mudah dijapai nengah inisiatif program betanam betupi ke udah diatur Perintah Nengeri.
“Aku chukup pechaya tembu projek jalai besai Pan Borneo jemah, Sarawak deka nyadi ‘food busket’ ke pemadu berat.
“Nengeri tu deka nyadi pemansut pemakai ke pemadu besai di Malaysia ke alai kami ba renggat Perintah Besai deka meri kerejasama ke pemadu manah ngagai Perintah Nengeri,”ku iya.
MAHA 2018 kemari dipenyadi Kepala Menteri Datuk Patinggi Abang Johari Tun Openg.
Nogeh nambah, Perintah Nenegri nengah Opis Menteri Betanam Betupi Moden, Tanah Adat enggau Pemansang Kandang Menua udah ngelanchar mayuh inisiatif ke dikearap ulih ngemansang industri betanam betupi nengah chara moden.
“Insiatif mega dilanchar ngambi ulih nambah asil betanam betupi sereta insiatif ngelaku asil nengah chara ke efisyen.
“Insiatif mega dilanchar ba sentang ekonomi digital ti meranka chara bekebun ke engkeman ti nguna teknologi baru baka ke dron kelimpah numbuhka palan ngempuru asil di serata Sarawak.
“Atur numbuhka palan pengelaku asil nengeri di Semenanjung Malaysia enggau Singapura mega entara inisiatif ti deka mantu,’ku iya ke mega Kaban Parlimen (MP) Mas Gading.
Ngenang sentang MAHA 2018, iya madah Sarawak iya nya Lundu nyadi palan keterubah dipilih lalu deka diadu di nengeri bukai sebedau dikerami besai di Dewan MAEPS Serdang ba bulan November 2018.
Di Lundu, 300 bansal endur mandang asil betanam betupi enggau produk bukai dibuka ngagai mensia mayuh.