Program Agropreneur Muda ngiching ulih nempa 1,000 pedagang Sarawak

LUNDU: Program Agropreneur Muda ke diatur Opis Menteri Betanam Betupi enggau Industri Asas Tani ba taun 2018 ngiching ulih nempa 1,000 iku orang dagang Sarawak.

Opis menteri nengah surat penerang berita kemari netapka program diatur enggau tuju matak raban nembiak ke beumur entara 18 nyentuk ngagai 40 taun ngaul diri ba pengawa betanam betupi.

‘Kelimpah ari nya, program mega dikena ngubah runding nembiak ba sentang pengawa betanam betupi ke tau nyadi industri ke tegap lalu tau mai penatai pemisi ke besai.

“Nambah penatai pemisi nengah chara ngangkatka asil, kualiti sereta rega makit ke tinggi,’ku surat penerang berita nya.

Ungkup taun 2018, setengah ari penyampau 1000 ke diselinting deka dipilih ari raban orang indu.

Pekara nya seraris enggau juluk Menteri Besai ti deka ngangkatka taun 2018 nyadi ‘ Tahun Memperkasakan Wanita’.

Penyereta Program Agropreneur Muda deka diberi 3 bengkah bantu iya nya bantu ba pekara teknikel, geran dikena ngepunka projek enggau duit jali ungkup ngemesaika projek.

Ba taun 2017 iya nengah Bajet 2017, Perintah Besai ngiching ngemansang 3,000 iku nembiak nengah Program Agropreneur Muda enti dibandingka enggau taun 2016 ke semina 1,000 iku aja.

Nyentuk ngagai 31 Disember 2017, penyampau 3,191 pinta udah dikemendar di serata Malaysia.

Ngenang kaul ke sama, 138 iku orang dagang/betanam betupi ari Sarawak nerima geran ‘ In Kind Contribution(IKC)’ ba penyampau RM2.247 juta.

Geran disua Kepala Menteri Datuk Patinggi Abang Johari Tun Openg rambau bejadi MAHA 2018 di Waterfront Lundu kemari.

Ari 138 iku nya, 68 iku nerima nengah ijinsi FAMA, 35( LKIM) enggau 35 ari MARDI.