Betanam nengah chara fertigasyen ulih nyungkak ekonomi menua pesisir
MUKAH: Betanam chara fertigasyen ulih nyungkak ekonomi peranak di kandang menua pesisir kelebih agi raban nembiak nengah utai tanam dagang besai.
Bala pesereta seminar bekaul enggau utai tanam fertigasyen ngaku pengelebih chara betanam nya kelebih agi di kandang menua Semop.
“Tukang Wang Saberkas Pampang Semop Gusti Sahdan, 48 taun, madahka di kandang menua Pulau Bruit bisi pengulih besai ba pen- gawa betanam chara nya.
“Pulau Bruit bisi pengulih besai ba chara betanam fertigasyen tu laban iya praktikal agi,” ku iya.
Pengawa tu dikelala praktikal agi laban ngena chara sereta teknologi moden lalu engkeman endar dibai ngagai raban nembiak.
Ba lansa bukai, Chairman Saberkas Unit Semop Rosita Jahari, 41 taun, madah chara fertigasyen begitang endang engkeman endar dibai ngagai kandang menua nya.
“Chara fertigasyen begitang ba penemu aku, engkeman agi di Kampung Semop lalu kitai deka ngemai chara tu ngagai raban nembiak,” ku iya nerang.
Seraya Sekretari Saberkas Cawangan Semop Hadi Selamat, 45 taun madahka chara fertigasyen tu endang muntang dikereja.
“Muntang endar dikereja lalu enda begunaka endur kelalu besai baka pengawa betanam chara lama,” ku iya.
Pengelicha seminar iya nya Pemesai Penguasa Stesyen Betanam Betupi Rampangi Mohd Zulkarnain Ben, 46 taun, madahka chara tu endang manah dikena ungkup dudi hari.
“Chukup manah ungkup raban nembiak laban chara tu bekenaka teknologi pemadu baru lalu bekaul enggau an- droin,” terang iya.
Tu ku iya nyengkaum meri sum, entali ai, nyaga tikas angin enggau ke bukai.
Sama bisi datai ngulu seminar Menteri Muda ba Opis Kepala Menteri ( Pekara Korporat) Abdullah Saidol ke mega nyadi Kaban Kunsil Nengeri (ADUN) Semop.
Program tu nyadi siti ari bagi pengawa Pemukiman Belia Saberkas Cawangan Semop ti udah digulu urung 100 iku nembiak ari 15 unit Saberkas Pampang Semop.
Kelimpah ari ngulu licha enggau randau pasal pengawa dagang enggau nyadi ketuai, bala pesereta mega bisi sempekat program outreach Tegas.
Antara batang tuju program dikena ngerapitka agi kaul kerejasama enggau penyerakup antara bala ketuai unit Saberkas di baruh pegai Pampang Semop sereta bala bakih Saberkas di Pampang Balingian.