BR1M ukai pengawa masau duit tang ngangkatka ekonomi menua, ku Norah
SARIKEI: Urung empat ratus mensia mayuh penerima Bantuan Rakyat 1Malaysia (BR1M) ari Pelilih Menua Sarikei, ke kena bungkur Parlimen P206 Tanjung Manis, iya nya ari sitak Kunsil Nengeri (DUN) N41 Kuala Rajang bisi nerima baucer BR1M sida ba atur pengawa ti digaga kemari.
Atur pengawa nyuaka baucar BR1M ngagai penerima bantu nya digaga ulih Kaban Parlimen Tanjung Manis, Datuk Hajah Norah Tun Abdul Rahman.
Dalam jaku Norah, iya madahka bantu BR1M mandangka Perintah betatika sada rayat, kelebih agi lebuh rega barang diatu majak mar.
“BR1M siti ari pengawa Perintah mantu ngelempungka penusah rayat. Dalam pengawa nimbang penanggul nya, Perintah udah nambahka penyampau agih BR1M tetiap taun, bepelasarka pemar pengelantang pendiau diatu.
“Enti diperatika enggau silik agi, BR1M ukai pengawa masau duit baka ke dipadah ulih sekeda piak. Pengawa ngagih BR1M enti diperatika ari sukut ekonomi, iya ulih ngangkatka ekonomi menua lebuh ungkup nya dibelanja kena bebeli barang ke diguna kitai.
“Gaya bansa tu deka meransang ekonomi domestik lalu nangkan nya mantu penumbuh ekonomi menua,” ku Norah.
Atur pengawa nya kemari digaga di Dewan Sri Nyelong Sarikei lalu bela digulu ulih Pemangku Pegawai Pelilih Menua Sarikei, Badjuri Bidin.
Norah nandu baru madahka, ke taun tu, Perintah udah melanja urung RM6.8 billion dalam ngagih BR1M ngagao semua penerima di serata menua.
Ku iya, ungkup BR1M ke taun tu mega meri pengelantang ngagai urung 7 juta iku penerima.
“Pengelebih ngagih BR1M tu mega mandangka pemesai menua tu udah mujur ngangkatka penambah ekonomi ba tikas ke manah, taja pan baka kediatu, dunya benung napi hal sereta penumbuh ekonomi ke lubah.
“Taja pia, Malaysia agi tan lalu pemesai menua tu mujur ngetanka ekonomi menua ari kena tinggang penanggul. Nya alai, kitai ke nyadi rayat, enti nunda patut beterima kasih ngagai pemesai Barisan Nasioal (BN) ke mujur ngereja pengawa sida iya enggau naka pemanah ngagai rayat.
“Beri sukung sereta pengarap kita ngagai pemesai BN, ngambika semua perambu sereta pemansang ke udah dipejalaika ulih digaga enggau mujur, ke deka meri pengelantang ngagai mensia mayuh,” ku Norah.
Ba atur pengawa nya, urung 153 iku penerima bisi nerima baucer BR1M RM450, lalu urung 250 iku penerima nerima baucer BR1M RM400.