Zaid ngarapka Sarawak, Sabah milih PH
KUCHING: Sarawak enggau Sabah enda patut nyukung 1Barisan Nasional (BN) enti deka ngasaika pengelantang dalam timpuh ke pandak, ku siku pemesai ke kala enggau UMNO, Dato’ Mohd Zaid Ibrahim.
Zaid, ti kala mangku pengawa nyadi Minister di Opis Menteri Besai, maya nya betanggungjawab dalam pekara Undang-undang sereta pasal ngaga pengawa balai bechara baru, madahka kededua buah menua di Malaysia Timur tu patut nyukung pemerat pasal Malaysia (“support what Malaysia is about”).
Iya madah, iya pechaya pengundi di Semenanjung Malaysia deka ngubah undi sida iya maya Pengawa Bepilih Besai menua ke-14 (PRU14) tu ila.
Iya madah “Umno tu betatika Melayu dulu, Islam dulu, duit dulu”, lalu nya kebuah Malaysia enda patut nerima polisi nya.
“Berapa taun sebedau tu, aku kala enggau Umno, lalu aku empu meda bakani ku pemesai salah ngena kuasa sida iya, makai suap sereta sumbung. Parti nya diatu enda ngipak gaya baka kediatu, pemesai sida iya pan enda ngipak agi megai Perintah menua tu.
“Kepala Menteri kita (Datuk Patinggi Abang Johari Tun Openg) madah ngagai kita, beri undi kita ngagai Perintah, ngambika ulih beta- war enggau Najib (Menteri Besai Datuk Patinggi Najib Tun Razak).
“Tang dalam kandang taun nya, kita (Sarawak) mayuh kerusi, kita agi ulih betawar enggau UMNO laban kita takut ke sida iya. UMNO mega menua tu nengah chara ngemelika mensia mayuh,” ku iya madah ba jaku iya lebuh di asuh bejaku ba atur pengawa makai lemai, ke ngena jaku rambai ‘New Deal New Hope’, ti digaga ulih Parti Tindakan Demokratik (DAP) semak enggau Restoren Hon Ang, malam hari Enam tu tadi.
Zaid madah “Umno deka alah dalam PRU14 tu ila, lalu aku ngarapka Sabah enggau Sarawak enda nyukung Najib”.
Ba penemu iya ku iya, Sarawak enggau Sabah deka ngaga penyalah ke pengabis besai enti kededua buah menua tu nyukung Najib, kelebih agi lebuh beratika ‘serata dunya tu ke ketawaka kitai (Malaysia), ukai semina ketegal 1MDB (1Malaysia Development Berhad) tang mega bakani ku sida iya ngaga garis entara sitak menua”.
Iya madah rayat Sarawak, enti diperatika, patut nemu sida iya nadai kebuah deka nyukung BN kelebih agi, mayuh penanggul bukai ke agi nekul menua tu.
“Kita deka minta pulai baru 20 persin royalti minyak enggau gis, tang bakani ku kita deka ngambi royalti nya pulai baru, enti kita empu enda ulih betawar enggau sida iya? Najib pan enda ulih meri ngagai kita, laban iya begunaka duit nya kena mayar semua utang menua tu nyengkaum urung penyampau RM52 billion utang 1MDB.
“Nya alai, enda ibuh kita deka berandauka MA63 ( Danji Malaysia 1963), ‘Sarawak For Sarawakians’ sereta autonomi kitai, nadai guna sekali. Seagi-agi kita nyukung iya, dalam kandang lima taun ti deka datai tu ila, semua pemerat nya agi bansa nya ,tang kita udah meri sida iya 50 taun,” ku iya.
Zaid nandu baru madahka pemesai di Sarawak “orang ke betatika pemerat sida iya empu laban sida nyukung Najib ketegal pemerat iya empu”, ku iya.
Nya alai, iya ngapil ngagai rayat Sarawak nulak pemesai ke semina betatika pemerat sida iya empu.
“Dalam pengawa bepilih tu, kitai bisi ( ex- Menteri Besai Tun) Dr Mahathir (Mohamad) nyadi pemesai di Semenanjung Malaysia. Ba barang penunga iya, kita beratika orang Melayu nyulung iya. Umur iya diatu udah manggai 93 tang iya agi ngarika kita, nya kebuah kita anang sekali enda meri iya pemujur tauka enda nyukung iya,” ku iya.
Zaid ngelalau rayat Sarawak ngundi ke gaya dudi hari jemah ila Malaysia, laban iya pechaya PRU14 deka ngubah pejalai menua tu.
“Sistem pelajar kitai mesti diubah. Kita enda ulih ngembuan sekula ke bebida sereta restoran ke bebida. Berapa bengkah agi pekara ke deka diserara kitai?
“Enti kita majak nyukung Umno, kita enda ulih ngubah menua tu laban Umno sigi udah kelalu laun enti deka diubah. Kitai mesti ngambi peluang tu, ngundi ke pemaik.
“Aku ngarapka kita berani, awakka pemesai kita pan berani. Pandangka ngagai pemesai kita di menua tu, kita deka ubah nya digaga, lalu ukai semina semaya ke datai tiap loma taun sekali. Undi meh ke pemaik Malaysia,” ku iya.
Sama bisi enggau ngulu atur pengawa nya kemari, chairman Pakatan Harapan (PH) Sarawak ti mega nyadi chairman DAP Sarawak, Chong Chieng Jen, chairman Parti Keadilan Rakyat (PKR) Sarawak, Baru Bian, pemungkal DAP Sarawak, Chong Siew Chiang, Kaban Parlimen (MP) Julian Tan, Kaban Kunsil Nengeri ( ADUN) Pending, Violet Yong, ex-MP Bintulu, Ting Ling Kiaw, Sekretari DAP Sarawak, Alan Ling, chalun DAP ke sitak Stampin Dr Kelvin Yii enggau Sekretari Publisiti Nembiak Sosialis DAP Petra Jaya, Abdul Aziz Isa.