BN10 PGA Sibu di Kem Lanang deka ngintu penumbuh sida kena bulan Ogos
SIBU: Sepengudah ditumbuh nyauka 49 taun, Batalion 10 Pasukan Gerakan Am (BN10 PGA) Sibu di Kem Lanang deka ngintu penumbuh sida kena bulan Ogos ti deka datai.
Pegawai Pemerintah BN10 PGA Sibu Supt Sanudin Md. Sa madah, BN10 enggau BN15 ditumbuhka kena 15 Ogos 1969.
“Hari bulan tu nyadi sejarah lalu kitai mega deka ngintu penumbuh ke-49 taun kena 15 Ogos 2018 tu.
“Pengerami tu deka diatur betikas besai diumbaka kem tu deka diganti taun dudi,” pia ku iya madah.
Iya mantaika jaku nya maya ba Pengerami Pengawa Berintai Hari Polis Ke-211 2018 Renggat BN10 PGA Sibu di Kem Lanang, kemari.
Bela ngulu pengerami nya, Penulong Pegawai Pemerintah BN10 PGA Sibu DSP Frediel Nyambong, Ajutan BN10 PGA Sibu ASP Lawrence Saran, Chairperson PERKEP BN10 PGA Sibu Rolia Mahed sereta bala bukai.
Maya ba pengerami tu, Sanudin macha jaku Kepala Polis Menua sebedau nyuaka setipikit ngagai bala raban polis, mensia mayuh enggau raban media.
Kelimpah ari nya, iya mega bisi nyuaka setipikit ngagai anak raban PGA ke mujur ba peresa perintah enggau pemeri ngagai raban ke udah pichin gawa.
Sanudin mega madahka pemutus ngatur pengerami ngintu BN10 nya bela bepun ari tangkan piak PDRM lebih agi ari Opis Pengelikun Dalam Menua enggau abatan Keselamatan Dalam Negeri Dan Pengelikun Mensia Mayuh Bukit Aman ti minta semua Batalion PGA ngintu penumbuh batalion sida.
Berebak enggau tu mega, iya minta bela ngarapka sebengkah gerempung alumni ungkup BN15 enggau BN10 ulih ditumbuhka enggau lengkas.
“Gerempung tu dikena kitai ngenang pemerani enggau budi bala bujang berani BN15 enggau BN10 suba.
“Pia mega kitai ngarapka gerempung tu ulih nyadi palan dikena nyintalka agi kaul bala raban lalu ngarapka pemerani sida semampai dikenang datai ke jemah ila,” ku iya.
Sebedau digelar BN10, sida mega kala digelar BN15, Pasukan Polis Hutan ti ditumbuhka ba taun 1969.
Agi BN15 suba, Pegawai Memerintah maya nya ASP Mohd Johny Mustapha enggau Konstabel Nuing Saling bebadi maya betimbak enggau penyelawai komunis ba Sungai Stabau kena 6 April 1975.