Diatu chukup mayuh bantu bisi disedia perintah lalu rayat patut fokus ngerebut peluang nya
BETONG: Rayat dipinta lebih fokus ngerebut awak ke bisi disedia sereta bela ngaul diri gawaka agenda pemansang di nengeri nyerumba pemansang menua ti begunaka penyikar kitai ngatur pengawa.
Sapit Kepala Menteri Datuk Amar Douglas Uggah Embas nyemetak madah, rayat enda patut semina ngandalka bantu aja lalu nadai pengeransing ngemansangka diri sereta berunding memanah dikena ngemansangka diri empu enggau bala komuniti.
Kenu ku iya, perintah udah bejalaika bemacham pengawa enggau agenda ba perambu ti meruan agi dikena nentuka rayat ulih nerima sereta bela ngaul diri dalam polisi dipejalaika perintah.
“Ari sukung diberi perintah enggau pengawa ngaku teknologi pemadu baru sereta bemacham polisi dipejalaika perintah, nadai kebuah rayat ngenggaika penau perintah ti nyediaka perengka guna ungkup rayat bela ngasaika teknologi ulih besemekih.
“Pemansut ke bisi nempa penau ngambika kitai patut gawa bendar agi sereta merambu ekonomi enggau nyungkak penatai pemisi ruang bilik diri empu,” ku iya.
Iya mansutka jaku nya lebuh Pengawa Bejadika Seminar Ngenegapka Raban Dagang Indu DUN N36 Layar enggau N37 Bukit Saban ti diatur di Balai Lumba Datuk Amar Stephen Kalong Ningkan Betong semak ditu, kemari.
Pia mega ku iya, ba pengawa ngenegapka raban indu ngambika meruan nyadi tiang institusyen ruang bilik, kaul ba mayuh bengkah pengawa patut diaku, ti berat agi sereta begunaka pengandal diri ti tinggi.
“Program diatur ngiri mayuh agi pengandal sereta meri awak ngagai raban indu nampung singkang diri ngulihka belanja diri sebilik.
“Berebak enggau nya, aku deka bekunsika pengulih ari seminar sekali tu deka ngemai siti penemu ti manah ngagai raban indu, datai ari bala exco Parti Pesaka Bumiputera Bersatu(PBB) ba pengulih program.
“Berindik ari penemu ti diiri enggau isi pekara ti beguna endar diulih tetiap exco ke bisi datai sekalika ngulu program seminar tauka kus patut dientudi enggau aum begulai enggau bala kaban sereta patut ditulis.
“Nangkan nya, raban exco mega dipinta nyediaka satu minit bekaul ti tau nyadi penerang kitai kala bejalaika pangku pengawa diri empu nyadika pengawa ti manah dipejalai seriris enggau polisi perintah dekaka kitai gawa begulai.
“Kitai patut bekunsika asil diulih lalu dikerembai ba runding rayat renggat baruh ti begunaka peransang positif sereta seruran bisi. Nya ke- buah aku dekaka asil nyadi digaga dalam minit aum ti patut disedia dalam timpuh seminggu lalu dianjung ngagai aku sereta bala ADUN kita empu,” ku iya nyemetak madah.
Ba lansa ke sama, Uggah ke mega Menteri Betanam Betupi Moden, Tanah Adat enggau Pemansang Kandang Menua madah sitak Layar enggau Bukit Saban ngembuan lebih 20 ribu ekar pemesai ti sebagi ari iya apin dikemansang lalu deka dipejalai enggau bemacham perambu.
“Antara perambu perintah ti udah dipesetuju ngambika dikemansang iya nya nanam rian, nanas enggau nyiur dikena nangkup peminta ti udah dibantai lalu deka dipejalai.
“Pia mega, perintah deka nentuka tetiap inchi tanah adat deka diperimba enggau asil ti tau mansutka penatai pemisi ti meri penguntung, laban iya lubuk pengaya,” ku iya.
Ba lansa bukai, raban gawa parti Barisan Nasional (BN) dipinta bebendar agi gawa dikena nentuka sukung nadai bebagi rayat ngagai bala ketuai ke bisi diatu.
“Baka selama, kitai nyadi penyukung kuat ngagai parti BN. Berebak enggau nya, kitai meseti ngayanka sukung nengah majoriti besai laban tu deka ngemuntangka kitai berandau enggau bala ketuai tetinggi ba pengawa ngemai pemansang ditu,” ku iya.
“Anang kitai alah laban jaku asut penyakal ti semina deka nginti sukung enggau mayuh macham semaya ti diberi tang enda dikeamat,” ku iya.
Sama bisi datai bini iya, Datin Doreen Mayang, ADUN Layar, Gerald Rentap Jabu enggau bini iya, Rosemary Wong, Penyanding Penemu Sains Nengeri Sarawak, Datuk Patinggi Tan Sri Alfred Jabu Numpang, Tan Sri Empiang Jabu, ex-ADUN Bukit Saban, Robert Lawson Chuat, Residen Bagi Menua Betong, Friday Belik, bala sekretari politik sereta bala ketuai opis komuniti ke bukai.