Raban polis Kapit dilalau semampai nyikap diri seriris enggau pemansang teknologi
KAPIT: Raban Polis Kapit udah ngatur program dikena ngintu genap taun ke-211 Polis DiRaja Malaysia (PDRM) enggau macha pesan jaku ari Kepala Polis Menua, Nyuaka Surat Sukung ngagai bala staf ti nyulut, melah kek sereta ngirup pagi, diatur kemari.
OCPD Kapit DSP Freddy Bian ngelalau raban nembiak iya ngambika seruran sikar napi ubah rampa kemaya hari ba pekara fizikal enggau peneras arus pemansang teknologi.
Iya mega minta mensia mayuh terus nyukung raban polis enggau madah sebarang penerang pengawa ti salah ditu ngambi atur patut dipejalai raban polis dikena nagang ulah salah nyadi.
“Kaul Polis enggau Komuniti Nadai Belengka – Raban polis enggau komuniti begulai munaska ulah ti salah. Aku minta semua polis seruran nyikap diri napi ubah rampa fizikal enggau pengelebih teknologi dikena nentuka raban polis meruan ngemai pangka ngetanka pengelikun mensia mayuh,” ku Freddy.
“Aku minta mensia mayuh terus nyukung raban polis enggau madah sebarang penerang pengawa ti salah ditu ngambi atur patut dipejalai raban poluis dikena nagang ulah salah nyadi.
“Bala komuniti meseti nyadi mata enggau pending kitai. Besaup kitai ngetanka pengelikun di Kapit,” ku Freddy nambah.
Beserimbai enggau pengawa sehari nya, iya udah nyuaka Surat Sukung ngagai Inspektor Muhd Ni- zam Mohd Izhar, Inspektor Isan Sari Hassang, Inspektor Norita Mohd Khairi, Sarjan Jiden Rawen, Johnny Rawing Ensegam enggau Roland Gasah, Koperal Philip John Tadol and Micheal Umap, Lans Koperal Muhd Hilmi Kamar Aris, Mohd Omran Omar enggau Amar Syarim sereta Konstabel Leonard Selin. Bala staf gawa perintah baka Mariam Batok enggau Lington Jalong.
ASP Chiew Swoi Kee, ASP Chua Su Hwa, ASP Fauzan Kassim, ASP Makkarannu Beddu, Inspector Ugendran A/L Nesaratnam, Inspektor Mohd Firdaus, Mahadi, bala ketuao opis, bala ketuai komuniti, ex- raban polis antara bala ke bisi datai ngulu pengawa kemari.