Pemerat ba pengawa negapka pemisi nengah DE ngipak endar, nitihka idar jeman beteknologi tinggi kemaya hari tu
KUCHING: Pemerat ba pengawa negapka pemisi nengah ekonomi digital (DE) Sarawak nengah iring Kepala Menteri Datuk Patinggi Abang Johari Tun Openg ngipak endar, nitihka singkang jeman teknologi tinggi kemaya hari tu.
Menteri Komunikasi enggau Multimedia, Datuk Seri Salleh Said Keruak madah nengah chara nya, deka ngangkatka Sarawak nyadi sebuah menua ke pengabis maju di Malaysia dalam timpuh 10 taun deka datai.
Iya nandu baru madahka, sebedau tu pemerat nya digaga ba perengka guna jalai alun enggau utiliti. Taja pia, DE nya diatu nguing ngagai perengka guna sereta pemaik sistem japai internet enggau teknologi tinggi.
“Enti suba, pemerat kami ngagai pemansang perengka guna jalai alun, bekal elektrik enggau ai.
“Tang diatu nyau nguing ngagai perengka guna inter- net laban rayat ukai semina deka kena bungkur internet aja tang peneras internet,” ku iya.
Bepelasarka pekara nya, Salleh madah nadai kebuah rayat Sarawak enda ngaul Perintah baka kediatu.
Lebuh nerangka jaku iya enggau silik agi, iya madah tuju pemesai menua ke betuaika Abang Johari laban deka muka peluang pengawa sereta negapka tikas ekonomi rayat sereta ngetanka hak menua.
Ba atur pengawa nya mega, Menteri Opis Kandang Menua enggau Pengawa Berumah, Datuk Profesor Dr Sim Kui Hian ngelalau semua parti komponen Barisan Nasional (BN) betatika pengawa menang dalam Pengawa Bepilih Besai ke-14 (PRU14).
“Kena peluang tu (PRU14) kena beratika BN deka mendang, kitai meseti ngubah chara kitai ke sekali tu.
“Kitai enggau politik ke semina ‘meda aja’ majak nyadi di sitak sida (penyakal),” ku iya.
Enti suba, pemerat kami ngagai pemansang perengka guna jalai alun, bekal elektrik enggau ai, tang diatu nyau nguing ngagai perengka guna sereta penderas internet. Datuk Seri Salleh Said Keruak Menteri Komunikasi enggau Multimedia
KUCHING: Kepala Menteri Datuk Patinggi Abang Johari Tun Openg didawa nyaruka penemu rayat Sarawak, enggau jaku ke dipansutka iya madahka Sarawak bisi kuasa ngadu pekara bekait enggau minyak enggau gis.
Chairman Pakatan Harapan (PH) Sarawak ti mega nyadi chairman Parti Tindakan Demokratik (DAP) Sarawak, Chong Chieng Jen, ke ngaga dawa nya nuju chairman Barisan Nasional (BN) menua madahka, nadai siku orang ke ulih ngenyamaka bagi kuasa enggau orang ke bempu.
Iya madahka Petronas kala nyadi kompeni minyak ke bempu minyak enggau gis di menua tu, nitihka baka ke udah ditulis dalam genteran tusun ukum Akta Pemansang Petroleum (Petroleum Development Act tauka PDA) 1974 taja pan Sarawak bisi kuasa ba hak nya.
“Au, amat meh bisi kuasa ngadu tang Sarawak nadai kuasa ngembuan. Reti nya, kitai semina agi bulih lima persin ari royalti minyak enggau gis nya.
“Abg Jo enda ulih ngambi 20 peratus royalti nya, taja pan dikemendarka dalam aum Kunsil Nengeri dalam taun 2014, tang diatu iya majak bejaku pasal kuasa ngadu (regulatory power).
“Kuasa ngadu tu nyerumba menijer bank menua. Kitai semua nemu orang ke bisi ungkup, bekunsika pengun- tung tang menijar nya semina makai gaji bulan aja.
“Reti nya Abg Jo ngenyemaka mata ikan nya nyadi mutiara,” ku iya madah lebuh bejaku ba atur pengawa makai lemai DAP ke ngena jaku rambai, ‘ New Deal New Hope’ di Restoran Hon Ang ditu, malam hari Enam tu tadi.
Chong, ti mega nyadi MP Bandar Kuching sereta ADUN Kota Sentosa madahka, enti rayat Sarawak majak nyukung BN maya PRU14 tu ila, pengawa ke deka digaga ulih BN menua tu iya nya majakka pengawa sida iya betawar enggau Menteri Besai Datuk Seri Najib Tun Razak, laban ngarapka hak menua tu dipulaika baru ngagai menua tu.
“Tang PH lain ari BN. Manifesto pengawa bepilih kami, terang mandangka Sarawak deka teulihka 20 persin royalti minyak enggau gis, nyengkaum kuasa penuh dalam pelajar sereta pengerai enti PH nyadi Perintah Besai.
“Enda ibuh betawar enggau PH Perintah Besai agi laban nya manifesto kami, iya nya semaya parti politik ngagai rayat.
“Enti kita majak ngundi BN, sida iya majak betawar. Entara nguji betawar sereta besetuju mulaika autonomi pelajar enggau pengerai ngagai Sarawak, aku pechaya kita nemu agi milih,” ku iya.
Iya madah semua PH minta pengundi Malaysia ‘ngundi ngena hak kita nukar Perintah”.
Chong nandu baru madahka, PH bisi empat pemerat, iya nya Chukai Servis enggau Barang (GST), Felda, IMalaysia Development Berhad (1MDB) sereta ex-Menteri Besai, Tun Dr Mahathir Mohamad ke deka ngulu ubah nya.
“GST meri empas ngagai rayat, sereta skandal Felda enggau 1MDB, nendurka pengarap rayat ba BN, lalu kitai bisi siku lelaki ajih, iya nya Dr Mahathir,” ku iya.
Iya madah ba aum iya enggau Dr Mahathir bedau lama tu tadi di Kuala Lumpur, pemesai BN maya iya agi megai Perintah, sigi enda kala negu pasal autonomi Sarawak ba aum kabinet Perintah besai.
“Iya (Dr Mahathir) madahka semua pemesai semina bejaku pasal projek pemansang, lalu nanya nama penguntung sida iya dalam projek nya. sida iya enda kala berandauka autonomi tauka royalti minyak enggau gis. Pekara ke dipinta sida iya semina projek aja.”
Iya madahka Dr Mahathir mega bisi madah ngagai iya, iya nya ukai salah iya lebuh pemesai BN minta projek aja.
Ba atur pengawa nya, DAP Menua mujur teulihka pupu dalam penyampau RM13,626 ke pengawa makai lemai nya, ke digulu ulih urung 1,500 penyukung.