Kes enchuri mutosikal ulih dikurang nengah penumbuh ‘Pasukan Tugas Khas’
KUCHING: Gaya pengawa salah ke nyadi di bandaraya tu agi ulih kuasa, alai penyampau kes ke timpuh 1 Januari ngagai 24 Mac taun tu, bisi udah nurun.
Ketuai Polis Pelilih Menua (KPD) Kuching SAC Abang Ahmad Abang Julai madah, ke timpuh nya, penyampau ke udah nurun nya, dalam 70 kes ti bisi dirikodka enti dibanding enggau timpuh ke sebaka ba taun siti nyin tadi.
“Ke taun tu, berengkah ari 1 Januari ngagai kemari, kami udah mujur ngurangka penyampau pengawa salah ke digaga di Kuching, ngagai 70 kes, tu pemujur ke semua raban IPD Kuching,” ku iya.
Iya madah munyi nya lebuh bejaku ba atur pengawa nyambut pengerami Hari Polis ke- 211 renggat Indu Opis Polis Pelilih Menua ( IPD) Kuching di padang baris IPD Kuching ditu, kemari.
Abang Ahmad nandu baru madahka, taja pan agi ba pun taun, kes pengawa salah mayuh bekait enggau pengawa bechurika mutosikal ngirauka ati, tang asil ari penumbuh ‘Pasukan Tugas Khas’ ngemunaska pengawa salah tu, iya mujur ngurangka penyampau pengawa salah di bandaraya tu.
Iya madah, raban nya betuaika Sapit KPD Kuching (Operasi) Superintenden Abang Junaidi Abang Anuar.
“pemerat tu enda ngetu ditu aja, laban pengawa tu deka dipajakka laban deka beritka penyampau pengawa salah di Kuching seruran ulih dikuasa,” ku iya.
Kelimpah ari nya, iya madah, pengawa ngemunaska pengawa salah narkotik mega bisi diperatika bisi kurang lalu tu mandangka gaya nya bisi manah mimit, alai ari pemujur nya, bisi sekeda orang ke mujur kena tangkap lalu dibai bechara ngagai kort.
“Pengawa tu mega asil kerejasama mungkur semua raban IPD Kuching nyengkaum gerempung ukai perintah (NGO) sereta opis enggau ijinsi Perintah bukai ke sama nyaup ngemunaska pengawa salah di bandaraya tu.
“Aku meri terima kasih ngagai semua ke enggau ngemutarka pengawa tu, laban deka beratika pengelatnag pendiau enggau penglikun bandar Kuching tu majak tegap,” ku iya.
Pengawa bebaris nya kemari bela digulu ulih urung 52 pegawai enggau raban bepangkat sereta nembiak sekula aro gerempung polis kaset sereta sekeda temuai bukai.
ba atur pengawa nya, Abang Ahmad bisi nyuaka setipikit meri puji ngagai penerima sereta meri insentif ngagai anak raban IPD Kuching ke udah mujur dalam peresa Perintah, UPSR, PT3 enggau SPM 2017.
Sama bisi enggau ngulu atur pengawa nya kemari, Sapit KPD Kuching (Pentadbiran) Superintenden Ismail Mahmood, Chairman Gerempung Kepolisian Komuniti Sarawak (PKKS) Datuk John Lau Pang Heng enggau sekeda temuai bukai.