Tanggungpengawa ngiring SIDS Sibu diatu dilempai ngagai komiti baru
SIBU: Sepengudah 17 taun diatu penuduk Chairperson Serakup Indu Dayak Sarawak (SIDS) Sibu Dato Ir. Alice Jawan manggaika tanggungpengawa nya ngagai komiti baru.
Komiti ungkup 2018-2020 tu besetujuka sida betuaika Angelyn Uchi Maseng ti mega orang lama dalam serakup nya.
Pengawa nyadi mandal dipegai Monica Giri lalu Michelle Hildalyne Jering nyadi Sekretari sereta disaup Claudia Dieo nyadi Pemantu Sekretari.
Pengawa Tukang Wang enggau Pemantu Tukang Wang dipegai Mundau Undau enggau Priscilla Bunsi David.
Komiti ke bukai dipilih maya tu iya nya Magdaline Segie, Elizabeth Raymond, Loryna Leman, Tuai Rumah Catherine Tamoh enggau Lynner Andrew Lenggie, Adina Sana, Magdalen Sinah enggau Senorita Salleh.
Alice maya tu agi dikeandal nyadi Penyanding Penemu serakup sida kelimpah Catherine Nain Abit.
Alice nyadi chairperson serakup nya kenyau ari taun 2000.
Maya berandau enggau pengarang berita sepengudah pengawa bepilih ke diatur ba sebengkah hotel nya, kemari, madahka iya nyadi raban serakup kenyau ari taun 1992 sebedau nyadi chairperson.
Iya mega kala nyadi Sekretari ba pengelama tujuh taun.
“Sekumbang 17 taun tu, aku berasai lantang ati laban tuju penumbuh serakup udah mayuh nyadi nyata.
“Ba pengelama tu mega, serakup ukai semina ngerembai ba penyampau tubuh raban tang mega mujur nyaup ngemansangka raban indu Dayak baikka ba pengawa nyadi tuai, dagang tauka ba penemu,” pia ku iya madah.
Ngenang kebuah tama nyadi raban keterubah suba, ku iya, tuju iya endang deka belajar ngajat.
Tang ba iya ku iya, serakup udah mayuh meri penemu ngagai iya baka begulai enggau pangan diri, bekerejasama enggau nerenak penyabar ati.
Maya ke agi nyadi raban serakup iya madah, Chairperson maya nya, Sandra Suda Ambas enggau Sekretari Catherine Nain (diatu Penyanding Penemu) meransang iya ukai semina nyadi raban komiti tang mega megai pengawa ke besai ba serakup.
Kelimpah ari nya, pengeransing megai pengawa besai ba serakup diumbaka eng- gau pengerindu iya ngagai Dato Sri Tra Zehnder ti ba iya siku orang indu ti ransing ngemansangka indu bansa Dayak.
Semua tu ngepun Alice bela ransing deka meda indu Dayak ngembuan penemu ke chukup alai iya ngantur macham bengkah program enggau licha baka sentang adat, pengerai, pekara bekaul enggau ruang bilik, dagang enggau penemu nyadi ketuai.
“Serakup ngemeratka kaul ke manah enggau pangan diri.
“Ba adat enggau main asal, kitai bela ngemeratka pengawa ngajat lalu diatu kitai meda semua bala raban dalam serakup nemu magang ngajat,” ku iya.
Ngena awak tu Alice ti mega Sekretari Mendam Opis Menteri Perengka Guna Mensia Mayuh ngarapka Uchi ti nyadi chairperson baru mujur nandu visi enggau misi serakup sida.
“Ngarapka komiti baru ti betuaika Uchi mai penemu ke baru ngagai tikas ke tinggi ba serakup,” pia ku iya madah.
SIDS Sibu ditumbuhka ba taun 1989 iya ke maya nya semina bisi 40 iku aja raban indu Iban.
Dalam kandang 29 taun tu, serakup tu diatu bisi lebih 1,200 iku raban baikka ari kandang mengeri tauka ari menua pesisir.