Gaga mayuh inisiatif dikena ngangatka pengawa lumba ba sitak menua pesisir
KUCHING: Mayuh agi inisiatif patut dipejalai dikena ngangkatka agi pengawa lumba ba sitak menua pesisir ti dipeda agi tinggal tauka kurang penerang pasal lumba di nengeri tu.
Menteri Muda Nembiak enggau Lumba, Datuk Snowdan Lawan madah perintah nengeri endang nerima manah pengawa nya dikena nempa mayuh agi atlit ti ngembuan penyulut tinggi sereta nempa Sarawak nyadi kuasa lumba.
“Tu serirs enggau juluk Kaunsil Lumba Nengeri Sarawak ti keran ba pengawa ngerembai enggau ngemansangka lumba bisi penyulut tinggi ti tegap dikena nempa atlit nengeri tu bisi kualiti, mujur sereta ulih besemekih di renggat pekit enggau pengandal ngangkatka agi nama Sarawak nyadi rumah kuasa Lumba.
“Bala atlit olahraga Sarawak ti benung bepekit ba pekit Lumba Komanwel di Gold Coast Australia baka Jonathan Nyepa enggau Nixon Kennedy dalam pekit kuartet 4x100 meter sereta Jackie Wong dalam pekit tukul besi bela nyadi duta nengeri ke pemadu beguna,” ku iya.
Iya mansutka jaku nya rambau Pengawa Ngelancharka Palan Latih Talent Outreach di Kompleks Lumba Padawan, Siburan ensana lalu mega udah digulu Ketuai Pemesai Eksekutif Institut Lumba Menua ( ISN), Dr. Mohd Khairi Zawi.
Sama bisi datai Ketuai Pemesai Eksekutif Gerempung Lumba Sarawak ke lalu nyadi Direktor Kaunsil Lumba Nengeri Sarawak, Dr. Ong Kong Swee enggau Residen Bagi Menua Serian, Jonathan Lugoh.
Nya alai ku Snowdan, kelebih agi opis menteri iya endang nerima manah pejalai program palan latih ari ISN di Siburan, ke alai iya andal amat palan tu deka ngerichahka agi kaul lumba kelebih agi bala nembiak di sitak Siburan, Padawan nyengkaum Serian.
Kelimpah ari nya, Program Talent Outreach tu mega bejalaika pangku pengawa ngemai kelala ba pekara Sains enggau perubat lumba ba pengawa nempa enggau ngemansangka atlit di renggat tumu.
Di palan latih Siburan, lumba olahraga ( jelan penyauh) udah dipilih ke alai iya diembing pematih, Abang Sapani Abang Sarbini, ngembuan peneleba besai dalam lumba olahraga, antara iya kala nyadi pematih olahraga rambau Sukma Sarawak, pematih olahraga ungkup Kaunsil Lumba Sekula Malaysia ( MSSM) Sarawak enggau mega pematih nasional ba Pekit Little Athletics di Perth, Australia.
Naka diatu, bisi 25 iku pesereta udah ngenukuka diri nyereta lalu enti sema nerima timbal manah ngelui ari 50 iku pesereta, ISN deka nambahka tubuh pematih ngambika batang tuju program ulih dijapai, kelebih agi ba pengawa ngerembaika pengawa mai kelala enggau ngaul diri ba lumba di kandang menua pesisir, ti kurang penerang pasal pengawa lumba.