Festa NBOS mujur mai servis opis perintah terus ngagai rayat
SARIKEI: Festa Strategi Tasik Biru Nasional (NBOS) udah mujur mai servis ejensi enggau opis perintah terus ngagai rayat di renggat baruh, pia ku Kaban Kunsil Nengeri (ADUN) Repok, Dato Sri Huang Tiong Sii.
Ku iya, program tu mega mujur nambahka pemanah pangka ngenataika servis perintah ngagai rayat.
“Nengah program ke bansa tu ( NBOS) udah mantu perintah meri awak manah agi ngagai rayat bela begulai ngaga polisi menua kelimpah teulihka pemaik ari perambu ti udah dilanggur.
“Prinsip NBOS iya nya nyelai ari chara bukai ti meri pemerat ngagai aktiviti ungkus baruh, mai pangka tinggi sereta jampat dipejalai,” ku iya.
Iya mansutka jaku nya rambau pengawa ngelanjarka Festa NBOS di laman Balai Suarah Sarikei, lemai ensana.
Lebih 30 bengkah ejensi perintah udah ngambi bagi dalam program tu, udah diatur pengelama tiga hari berunggu.
Nitih ku Huang, program tu mega meri awak ngagai bala komuniti ngaul semak bala ketuai sereta nanggam kaul rat antara semua raban.
Nengah program tu mega, ku Huang, meri awak ngagai bala komuniti enggau raban pedagang chakah agi ba aktiviti dagang sida.
“Ba aktiviti bansa tu, raban tu ulih nyual produk sida. Tu mega siti awak chukup manah ngagai sida ngemai sereta mandangka asil ngagai dunya luar.
“Kitai ngarap ari pengawa ngatur program baka tu ulih meri pangka positif ti besai ngagai raban tu ngambika terus nyingkang mansang ke mua lalu nyapai pemujur,” ku Huang nandu.
Berebak enggau nya, Huang mega bisi nyuaka perais ngagai pemenang chabut benasit enggau bangsal pemadu manah Kategori Servis enggau Pengawa Mandang.
Pemenang chabut benasit ti nyediaka perais sebuah kerita rambau Festa NBOS sekali tu udah dimenang siku pinchin polis, Dickson Pador Bandok.
Sepenyampau 9727 penyereta udah diterima raban pengatur ti nyereta pekit sekali ti.
Ungkup bangsal pemadu manah Kategori Servis enggau Pengawa Mandang, champion dipenggi Opis Tanah enggau Survei Sarawak, kedua GiatMara lalu ketiga Raban Soldadu Malaysia (ATM).
Sama bisi datai Residen Bagi Menua Sarikei, Mohamad Junaidi Mohidin enggau Pemangku Pemesai Pelilih Sarikei, Badjuri Bidin.