74 JKKK di Parlimen Kapit nerima geran khas ari Nanta
KAPIT: Sapit Menteri Pemansang Menua Pesisir enggau Kandang Menua (KKLW), Datuk Alexander Nanta Linggi udah nyuaka geran projek khas penyampau RM795,000 ngagai 74 Komiti Pemansang enggau Pengelikun Genturung Pendiau ( JKKK) pulaika pemaik ngagai 1554 ruang bilik di baruh pegai tiga iku penghulu iya nya Penghulu Galau Anak Melina, Penghulu Sumpeng Anak Jinggai enggau Penghulu John Salang Anak Manggau di Pelilih Song, di baruh sitak Parlimen P215 Kapit.
Ungkup kandang menua dipegai Penghulu Galau Anak Melina (menua ili Katibas), geran projek khas udah diberi ngagai 30 JKKK penyampau manggai RM332,000 ti ngaul 647 ruang bilik.
Nangkan nya, ungkup kandang menua dipegai Penghulu Sumpeng Anak Jinggai (menua tengah Katibas), geran projek khas meri pemaik ngagai 24 JKKK ti ngaul 519 ruang bilik ke alai penyam- pau manggai RM270,000.00 Kandang menua ulu Katibas di baruh pegai Penghulu John Salang Anak Manggau nerima RM193,000 geran projek khas diungkup ngagai 20 JKKK, ngaul 388 ruang bilik.
Geran projek khas diberi ngagai tetiap ruang bilik ari JKKK ke alai sida bela nerima RM500 sepintu.
Ba jaku dipansutka Nanta rambau pengawa nya, madah, taja parlimen udah dipadam kena 7 April tu tadi, iya agi bisi kuasa meri geran dalam kuasa iya nyadi sapit menteri, ti gawa nyadi pengibun perintah sebedau pengawa bepilih besai.
Pengawa nyuaka geran udah diatur nyerumba pengerami makai lemai kelai nutup program ‘ Kasihi Pekebun RISDA Negeri Sarawak’ enggau Seminar Ekonomi Rama Ungkup Bala Ketuai Komuniti ti diatur begulai Opis Pemansang Orang Betanam Getah Kebun Mit (RISDA) enggau Opis Pelilih Song di Pelilih Song, diatur di Balai Komuniti Song, apin lama ke udah. Dulu agi ari nya, Nanta mega bisi nyuaka baucher Bantu Rakyat 1Malaysia (BR1M) ngagai bala penerima di Pelilih Song.
Sama bisi datai Sekretari Politik Kepala Menteri Sarawak Tapah Ata, Pemesai Pelilih Song Jackline Bte August, bala pemesai RISDA ari indu opis di Kuching enggau pampang Kapit, bala ketuai ari mayuh bengkah opis perintah sereta bala ketuai komuniti.