PH bisi peluang besai ngerampas Putrajaya: Chong
SIBU: Chairman DAP Nengeri, Chong Chieng Jen beratika Pakatan Harapan (PH) bisi peluang ke besai ulih ngambi Putrajaya ari Barisan Nasional (BN) maya Pengawa Bepilih Besai Ke-14 (PRU14) tu.
Bejaku ba aum pengarang berita pengudah ngelancharka Palan Operasyen Pengawa Bepilih P211 Lanang di Jalai Aman ditu ensanus ku iya, DAP nyadi sebagi ari PH ba jalai ke penudi endar nujuPutrajaya.
“Pejalai kami udah berengkah kenyau ari pengawa bepilih mit di Sibu dalam taun 2010.
“Pengawa bepilih mit diaku baka engkeramat politik. Wong Ho Leng, ti udah midang ulih ngerampas penuduk nya taja belaban enggau semua pekara tau nyadi,” ku iya nikalka kenang.
Ku Chong, DAP udah enggau ba pengawa bepilih mit nengah defisit 3,000 undi taja pan Menteri Besai Datuk Seri Najib Tun Razak balat tebilang nama.
“Tang Sibu nempa engkeramat politik ti udah nya ngujungka penyakal menang ba pengawa bepilih renggat nengeri enggau perintah besai.
“Kami mimit agi deka nukar perintah. Diatu, kami majak semak sesemak nyapai tagit nukar perintah lalu nya ba bagi ke penudi pejalai tu.
“Nya alai aku minta peranak di Sibu, enti sema sida bisi bala bakih tauka kaban belayan belajar di menua tasik, kangauka sida pulai ngundi. Aram kitai begulai enggau kaban kitai di Se- menanjung Malaysia enggau Sabah gawa nukar perintah ke ‘buruk’ lalu meri bala anak kitai pengidup ti menyana agi di menua tu,” ku iya.
Chong, ke mega MP Bandar Kuching, merambu ke alai ubah ba perintah besai nadai meri empas ba pejalai polisi Perintah Sarawak.
“Tang pemujur kami ba renggat perintah besai ulih nentuka tetiap sen ti udah diungkup deka dibelanja ungkup rayat,” ku iya.
Ngenang pasal jaku selebubu ti madahka BN Sarawak deka nyemilik PH ngambi numbuhka perintah besai, ku iya, BN Sarawak dalam zon ke lantang lalu dipelaba enda patut deka ngalih.
“PH patut menang 112 penuduk ngambika ulih numbuhka perintah besai. Enti kitai bisi penyampau nya, aku pechaya mayuh pengari rayat ari baruh tikit BN deka engkechit ngagai kapal kami.
“Sida tu deka enda berasai lantang dalam penyakal,” ku iya merambu.
Chong madahka PRU14 tu nyadi kelang sabung antara rayat enggau UMNO.
Iya nyalahka Perintah BN laban balat ngenusahka rayat, bisi nurun ba standard pelajar, penatai pemisi baruh enggau belanja idup tinggi.
“Raban ke batang ngaga polisi perintah ti enda manah tu iya nya UMNO. BN Sarawak nemu pekara tu, nya kebuah BN Sarawak nyeliahka diri berandau pasal polisi perintah besai maya pengawa bepilih parlimen,” ku iya, seraya nambah, BN Sarawak semina nyebut pasal polisi Perintah Sarawak.
Berebak enggau nya, Alice Lau ti deka ngetanka penuduk iya di Lanang maya bepilih tu, madahka sekali tu PH datai deka ngerampas Putrajaya.
“Diatu tauka enda sekali,” ku iya.
Sentang Palan Operasyen Bepilih Lanang P211, ku iya, tu palan ungkup bala pengundi meresa dini endur sida ngundi.
“Bala sida ti volunteer datai nyadi ejen pengawa bepilih enggau ejen ngira undi (PACA) tau ngerejista nama sida ba palan tu,” ku iya seraya ngapil ngagai mensia mayuh nyadi raban volunteer.
“Kami begunaka mayuh ejen pengawa bepilih enggau ejen ngitung undi nentuka pengawa bepilih beresi,” ku iya.
Sekretari Parti Keadilan Rakyat (PKR) pampang mit Kanowit, George Chen madahka iya berasai sinu enggau inisiatif ari mayuh gerempung ukai dikuasa perintah (NGO) ti udah bepupuka belanja ngambika bala nembiak ke agi nampung pelajar enggau bala pekereja ari Singapore sereta Semenanjung Malaysia ulih pulai ke menua ngundi.
Ngenang pasal pengawa bepilih, iya pechaya PH ulih menang abis nadai tiga penuduk baru menua pesisir, tang enda madahka bagi penuduk nya.
Sama bisi datai ba aum pengarang berita nya iya nya chalun DAP di Sibu Oscar Ling, ADUN Tanjung Batu Chiew Chiu Sing, ADUN Padungan Wong King Wei, ADUN Pelawan David Wong, enggau ADUN Pujut Dr Ting Tiong Choon.