AEON CO. (M) Bhds (AEOC) keterubah di Sarawak deka dibuka kena 20 April
KUCHING: Palan bebeli barang ti keterubah AEON CO. (M) Bhds (AEOC) di Sarawak ti deka dibuka kena 20 April tu,ukai semina nyendiaka peneleba manah bebeli barang ngagai mensia mayuh, tang mega nyendiaka urung 1,000 peluang gawa ngagai peranak nengeri tu.
Manijar Palan Bebeli Barang, AEON Mall Kuching Central, Derick Dingus madahka tebal agi AEON meri peluang ngagai peranak nengeri tu kelebih agi ke diau di mengeri besai tu.
“Kami AEON ditu bisi 95 peratus pengereja pengawa peranak menua Sarawak. Palan Bebeli Barang (AEON Kuching) aja kami bisi urung 320 pengereja pengawa ke diambi ari menua Kuching.
“Kami mai setengah ari sida ke Johor, diberi latih sebedau dibai pulai baru kitu lalu muka stor ditu,” ku iya.
Derick mantaika pekara nya lebuh dikerandau ba aum pengarang berita nyerumba penemuai raban pengarang berita ngagai AEON Mall Kuching Central ditu, kemari.
Dulu ari nya Derick disempulang dua iku Eksekutif Direktor AEON CO ( M) Bhds Poh Ying Loo enggau Hiroyuki Kotera ke mai raban Media bejalai dalam palan bebeli barang nya.
Poh dalam aum pengarang berita ke sama madahka kelimpah ari pengereja pengawa AEON empu, palan nya mega nyendiaka palan nyuwa ngagai peranak nengeri tu.
“Enti ba bagi ngatur pen- gawa, dagang sereta AEON Store dipegulaika enggau semua penyuwa enggau pengereja pengawa sida penyuwa, aku pechaya kami nempa urung 1,000 pengawa puang,” ku iya.
Nambahka nya, Poh madahka AEON meri peneleba bebeli barang ti bebida ari palan bebeli barang ke bukai berindik ari ti mai penyuwa ari antarabansa, Semenanjung Malaysia enggau ari nengeri tu empu.
Kelimpah ari nya AEON ti mungkur pemesai 560,000 kaki pesegi, endur bejual tiga ringkat sereta nyendiaka 1,800 endur ngengkahka kerita lima ringkat enggau seringkat baruh tanah.
Palan bebeli barang nya bisi nyendiaka endur bejual ngagai lebih 135 penyuwa sereta narit mayuh chap antarabansa, mayuh kaunter pemakai enggau ai irup enggau ke bukai.
AEON Mall Kuching Central ti dipenyadi nya deka nyadika AEON CO, (M) BHD, ke alai diatu bisi 27 AEON Mall enggau 35 AEON Stores di serata menua.
AEON Mall Kuching Central bisi seringkat pasar besai AEON, dua ringkat kedai bemacham barang AEON, kedai pengerai chap baru AEON enggau kedai bukai baka Ubiso, Kaison, SenQ, Popular, Supersave Elite enggau Daiso.
Nambahka nya disikap enggau endur beperindang baka panggung wayang, endur karaoke, gim sereta endur anak mit bemain.