Sektor peribit PKS diperansang nyereta IDECS 2018
IDECS 2018 deka berandau sereta ngepunka inisiatif baru enggau pelin Kereja Strategi Ekonomi Digital Sarawak
KUCHING: Sektor peribit nengeri tu sekalika dagang besai tauka dagang mit enggau jelan pemesai (PKS) diperansang nyereta Aum Besai Antarabansa Ekonomi Digital Sarawak (IDECS) 2018, kena 14 - 15 Mei tu.
Sekretari Perintah Nengeri, Tan Sri Datuk Amar Mohamad Morshidi Abdul Ghani madahka IDECS ti kedua kali nya deka diatur ba BCCK nya sereta berambaika jaku ‘Data to Fuel New Economic Growth and Quality of Life’.
“Perintah nengeri meransang sektor peribit nengeri nyereta aum besai ti dinamik tu. Ambi mih peluang tu laban sida tu (sektor peribit) mega begunaka teknologi.
“Juluk kami ba aum besai taun ngarapka penatai 2,400 iku pesereta ari menua tu enggau antarabansa. Ditu aku deka madah naka ke diatu bisi 1,800 iku pesereta udah ngerejista diri ngulu aum tu.
“Objektif aum besai (IDECS) taun tu deka berandau sereta ngepunka inisiatif baru enggau pelin Kereja Strategi Ekonomi Digital Sarawak (2018-2022),” ku iya.
Morshidi mansutka pekara nya dalam aum pengarang berita pengudah nyadi chairman aum IDECS 2018 , ti diatur ba Bilik Baum Ringkat 2 Wisma Bapa Malaysia ditu, kemari.
Nambahka nya, iya madahka aum nya mega nyadi pelasar ngulihka penemu ngambika ulih meretika agi baka ni digital enggau teknologi jemah ila ti nempa sereta ngubah chara bejaku tauka berandau ba endur gawa enggau dalam pengidup ninting hari.
“Aum besai (IDECS) tu dipelabaka deka dipenyadika Kepala Menteri Datuk Patinggi Abang Johari Tun Openg,” ku iya.
Bisi empat pekara udah ditentuka dikaumka sekali tu iya nya Data Intelligence; Start-ups; Komuniti Pintar enggau Perintah Digital. Semua nya mungkur ekosistem data ekonomi.
Nitih ku iya bisi 17 iku speaker nyengkaum antarabansa ti landik sereta pandai dalam Chief Data Scientist, Digital Strategist for Sweden Government, Cybersecurity and Internet of Tbings (IoT) designers.
“Utai ti lebih narit ati ba aum tu iya nya kitai ngangauka siku speaker lelaki ti beumur 14 taun ti landik dalam Artificial Intelligence (AI) iya nya Tanmay Bakshi. Iya diatu gawa enggau IBM dalam sekeda projek AI,” ku iya.
Kelimpah ari nya IDECS 2018 bisi ngatur pengawa pemandang ti dipasuk 26 raban pemandang ti ngayanka produk teknologi enggau servis inovatif ti pemadu baru baka CISCO, Huawei, IBM, Sarawak Energy enggau ke bukai.
IDECS 2018 mega bisi mandangka orang ti pandai sereta landik dalam menua tu nengah “Hackathon” IDECS ke dibuka ngagai nembiak menua tu. “Hackathon” dipenyadi kena 13 Mei ba BCCK sereta nadai bebayar.
Sesapa ke bisi ati ngerejista diri nengah online tau ngerejista diri nengah www.idecs.sarawak.gov.my.
Sama bisi dalam aum pengarang berita Sapit Sekretari Perintah Nengeri, Datu Dr. Sabariah Putit enggau ke bukai.
Perintah nengeri meransang sektor peribit nengeri nyereta aum besai ti dinamik tu. Ambi mih peluang tu laban sida tu (sektor peribit) mega begunaka teknologi. Tan Sri Datuk Amar Mohamad Morshidi Abdul Ghani Sekretari Perintah Nengeri