Tu ngambika sida bisi dilindung insurans maya ditinggang penusah enda disadang maya gawa kediri
BINTULU: Deriba teksi tauka orang ti bejalaika servis sebaka diperansang ngerejista diri ba Skim Bebadi Maya Gawa Kediri Empu di baruh Organisayen Pengelikun Rama (Socso).
Menijar Socso Pampang Bintulu, Jimmy Hendrick Kijon madah skim tu berengkah diterit 1 Jun 2017 tu dikena nyaga orang ti gawa kediri ngambi bisi dilindung insuran ari bakal maya gawa nyengkaum sakit maya gawa enggau ditinggang penusah ngenyit maya gawaka aktiviti bekaul.
Ku iya, pengawa nyaga pengelikun rama tu diberi dibaruh ‘Self Employment Social Security Act’ 2017 lalu iya nya enda tau enda deriba teksi enggau orang ti gawa kediri bejalaika servis ke sama.
“Timpuh pengelikun sida dijaga iya nya 12 bulan bepun ari hari bulan enggau jam timpuh udah bayar digaga lalu dipandang nengah resit,” ku iya madah ngagai penga-
Timpuh pengelikun sida dijaga iya nya 12 bulan bepun ari hari bulan enggau jam timpuh udah bayar digaga lalu dipandang nengah resit. Jimmy Hendrick Kijon Menijar Socso Pampang Bintulu
rang berita di opis iya ditu, kemari.
Berebak enggau nya ku iya, skim tu mega nyediaka faedah mata duit ngagai deriba teksi enggau orang dipelanja sida kelimpah nyediaka perubat, mulaika pengerai batang tubuh enggau latih vokasional.
Iya nyemetak madahka bansa servis teksi ti disengkaum dibaruh skim tu iya nya teksi bajet, teksi eksekutif, limousine, teksi padang bilun, kerita suwa, uber enggau Grabcar.
Nitih ku iya, bayar ngagai socso ti mungkur setaun ulih dibayar online nengah internet banking di www.iperkeso. my tauka bayar ngena mata duit di opis serata menua.
“Kitai udah bejalaika dua program bekaul, meri penerang ngagai bala deriba teksi di sebengkah hotel enggau numbuhka bangsal kami di Padang Bilun Bintulu dikena ngelakuka skim tu.
“Taja pia kami semina ngerikod tiga iku deriba teksi aja di baruh skim tu taun tu lalu aku dipadah semina bisi beberapa ratus aja sida di Bintulu,” ku iya, seraya nambah, nyangka bisi kebuah sida enda nitihka atur tu.
Nya alai iya ngingatka sida ke alai skim tu enda tau enda lalu iya udah terang dipadah di baruh undang-undang.
“Penerang silik pasal skim tu enggau pampas iya tau ngetu betanya di Opis Socso Bintulu kami lalu kami deka nerang silik ngagai tubuh kita empu,” ku Jimmy.
Antara pampas ari skim tu iya nya pampas perubat, pampas tachat sementara, pampas tachat seumur idup, elawin seumur idup, pampas orang ke ditupi, pampas penusah rabat, pampas pelajar enggau perengka guna ungkup batang tubuh enggau latih mulaika pengerai vokasional.