MARA dipinta nyendia mayuh agi premis ungkup pedagang Bumiputera di Kapit
KAPIT: Sapit Menteri Pemansang Menua Pesisir enggau Kandang Menua (KKLW), Datuk Alexander Nanta Linggi minta Majlis Amanah Rakyat ( MARA) ngaga mayuh agi premis dagang ungkup bala pedagang Bumiputera di Kapit.
“Pekara dipinta kitai ari MARA di Kapit iya nya kitai diatu bisi lapan lot tauka premis disuwa ngagai bala pedagang menua tu lalu aku pechaya enda lama agi enda tetangkupka penyampau peminta majak nambah bala pedagang, nya kebuah aku minta MARA ngerumban pengawa ngaga premis dagang baru ungkup pedagang Bumiputera di Kapit ditu,” ku Nanta rambau aum pengarang berita pengudah bejadika pengawa ngelanchar program ‘Aram Pulai Ke Menua MARA’ di Pasar Kapit, Hari Minggu tu tadi.
Ku Nanta, kelimpah ari patut ngaga mayuh agi premis dagang, Bagi Menua Kapit mega udah dikelala nyadi MARA EduBiz Park di nengeri Sarawak, iya nya palan dagang enggau pelajar.
“Reti iya, ari program tu, pekara disadang kitai iya nya MARA deka fokus ngagai pengawa dagang sereta mega ngelakuka perengka guna pelajar enggau pelajar tinggi dikena matih peranak menua pesisir.
“Aku ngarapka program MARA EduBiz Park ulih dipejalai enggau jampat,” ku iya seraya madahka iya berasai siru sereta gagit meda pemayuh tubuh nedat program Jom Balik Kampung nya.
“Tu ngayanka rayat bisi pengiruh deka nemu penerang pasal pelajar enggau awak dagang lalu lebuh sida datai kitu enggau pemayuh tubuh baka tu, sida mega meri peransang ngagai MARA ngatur mayuh agi program ke sama jemah,” ku iya.
“Lalu sehari tu kitai ngemataka pengawa nyuaka tujuh unit motosikal di baruh projek Mobilepreneurs ti disikap enggau kutak ngembuan mayuh bansa kereban enggau perengka.
Enti orang nya ngaul diri ba pengawa pemajik, iya tau ngambi semua set penyikap perengka guna ungkup skop kereja ngemajikka mua. Pia mega sida ti ngaul diri ba dagang elektronik, miki kereban elektrikal, iya tua ngulihka set penyikap elektrikal dalam kutak.
“Ungkup semua set motosikal Mobilepreneurs beungkus RM10,000 sebuah lalu ungkup semua tujuh buah Mobilepreneurs, ungkus manggai RM 70,000.
“Tu siti ari program dipejalaika MARA lalu program tu mega di baruh KKLW nguji ngenegapka rayat nengah pengawa dagang. Aku temegah agi udah ngaul diri dalam opis menteri kandang lima taun ke udah, ke alai MARA enggau sekeda ejensi bekaul bukai, sida suah udah kiruh datai ngagai Kapit, nyengkaum raban ari RISDA, FELCRA, GiatMara, KEMAS enggau program outreach sida ngagai rayat lalu tu penguntung kitai nengah KKLW, kelimpah ari projek penyikap perengka guna pemun ke bukai ungkup kandang menua pesisir baka bekal kuasa karan, bekal ai enggau jalai alun.
“Kitai mega beratika KE- MAS ke alai kitai ngembuan pemansang modal mensia ari sida ke nembiak sereta dikenegap nengah MARA baka udah disebut aku dulu tadi, nya alai, rayat teulihka belanja ungkup pengidup sida empu. Lalu tu lebih agi baka pengawa holistik dipejalaika KKLW ngenetapka peranak menua pesisir,” ku iya.
Lebuh dipinta ngelansa pasal Kolej Profesional MARA di Kapit, ku Nanta, tu siti ari palan pelajar tinggi di baruh MARA baka Institut Pengajian Tinggi MARA ( IPTMA) kitai bisi Kolej Politek MARA enggau Kolej Profesional MARA.
“Aku udah dipadah ke alai Kolej Profesional MARA, bala nembiak iya enda ibuh bebayar.
Sida dipelanja perintah, enda baka sida tama ngagai Kolej Politek MARA (KPM) ke alai sida bisi bebayar lalu bala nembiak nginjau ari PTPTN tauka ngena belanja diri empu. Tang enti ka tama ngagai Kolej Profesional MARA, aku bisi diterang nadai bebayar, nya alai bisi awak besai ngagai bala nembiak ari menua kitai,” ku iya.
Ku Nanta, iya udah nganjung peminta ngagai MARA ngambika Kolej Profesional MARA ditumbuh di Kapit, dikena nambahka MARA ke bisi gawa ditu, diatu.
Ngelansa pasal program Aram Pulai Ke Menua, ku Nanta, iyda diatur meri penerang ngagai rayat kelebih agi di Kapit pasal nama pengawa bisi disediaka MARA nengah mayuh bengkah palan pelajar sida baka YPM, MRSM, IKM, GiatMara nyengkaum palan pelajar tinggi di Kuala Lumpur enggau palan pelajar tinggi mega bisi dipandangka MARA, madah ngagai mensia mayuh ba pengawa ke bisi lalu baka ni MARA tau meri bantu ngelakuka dagang sida, ngambika sida ulih nyungkak penatai pemisi ari ngereja pengawa ngatika diri.
Ku iya nambah, mayuh program nengah MARA kelebih agi ba pekara bantu sekalika ngemesaika dagang, ngepun tauka semina meri bantu belanja ngagai sida lebuh bisi projek, ke alai diatu benung dipejalai sereta mayuh bansa program melanja ari MARA udah dikerembai ngagai peranak di Kapit.
“Aku berasai lantang sereta muji pemanah pengawa dipejalaika MARA, ukai semina sekali tu aja, tang sida udah mayuh ngereja pengawa ke sama di Kapit, taja kitai jauh ari menua bukai, tang MARA seruran ngaul kitai dalam program sida, reti iya, MARA chukup ibuhka peminta peranak di menua ulu di Kapit,” ku Nanta. MIRI: Chalun Pakatan Harapan (PH) ari Parti Keadilan Rakyat (PKR), Dr. Ricardo Yampi Baba udah muka opis operasyen iya di Jalai Tarap, Limbang, pun minggu tu tadi.
Ku iya, opis deka berengkah dibuka pengudah hari ngantung nama kena 28 April, ke alai semua aktiviti PH enggau perengka dikena bekimpin deka diengkah dia.
“Opis ditumbuh tu semina deka berengkah gawa pengudah hari ngantung nama,” ku Dr. Ricardo lebuhkah dirandau di Limbang kemari.
Nitih ku Ricardo, iya pulai ke Limbang lebuh ujung minggu lalu numbuhka opis nya.
Ku iya, palan gawa ungkup PKR semina deka gawa pengudah hari ngantung nama lalu deka seruran gawa dataika hari ngundi dalam pun bulan baru.
Dr. Ricardo iya nya orang baru lalu dipelaba deka bediri minta pilih ngelaban penyandang penuduk Limbang ari Parti Pesaka Bumiputera Bersatu (PBB), Hasbi Habibollah.
Ricado bisi dikangau gawa ba University of Technolong Brunei kelimpah ba Curtin University Malaysia, University Malaysia Sarawak sereta University Malaysia Sabah.
Siku orang ti bisi pelajar Doctor of Business Adminstration dalam International Banking ari University of South Australia, Master of Business Adminstration dalam Marketing and International Business ari University of New Haven, Bachelor of Business Adminstration dalam Management ari Ohio University, sereta Diploma dalam Public Adminstration ari University Technology Mara.
Rambau Pengawa Bepilih Besai Ke-13 (PUR13), Hasbi PBB teulihka 12, 999 undi ngalahka Baru Bian PKR ti bulih 4, 698 undi.