Kerejasama apai indai, pengajar meri pangka besai ngagai nembiak
SARIKEI: Kerejasama antara apai indai enggau bala pengajar ulih meri pangka besai ngagai pemujur pengawa ngajar enggau belajar ba nembiak sekula.
Menteri Muda Perambu Mengeri, Pengatur Tanah enggau Rampa Menua, Datu Len Talif Salleh madah kerejasama ke bansa nya ulih dipeda nengah program Strategi Tasik Biru Nasional ( NBOS) ti dikemeranka perintah Barisan Nasional (BN).
NBOS nempa servis ti sikar, mai pangka sereta muntang seriris enggau rambai jaku perintah BN ‘People First, Performance Now’, ku iya lebuh bejadika Program Pemesai Begulai enggau Rayat enggau KITA Recycle Fiesta NBOS 2018 diatur Gerempung Apai Indai enggau Pengajar (PIBG) Sekula Primari (SK) Agama, Sarikei di sekula nya, apin lama ke udah.
Nyemetak madahka pemesai guna kerejasama antara apai indai enggau bala pengajar, Len ngansak raban PIBG sekula ngatur mayuh agi program ke alai tuju iya nambahka agi semangat kereja siti tim enggau semangat bekerejasama.
Nangkan nya, perintah BN udah bisi pelin komprehensif dikena nambahka kualiti pelajar kitai baka ti udah dibantai dalam Education Blueprints, School Tranformation 2025 (TS2025) sereta inisiatif ke bukai, ku iya.
Rambau program nya, Len udah nyuaka geran penyampau RM10,000 ungkup belanja aktiviti PIBG sekula nya.
Antara bala bisi datai Sapit Residen Sarikei, Abang mohd Porkan Abang Budiman, Kepala Pengajar SK Agama Sarikei, Jamaluddin Sahari, Chairman PIBG, Salleh Sidi, Pemangku Pemesai Pelilih Sarikei, Badjuri Bidin, pemesai ari Opis Pelajar Pelilih Sarikei, Abdul Aziz Razali sereta bala ketuai komuniti.