GDO 2016 deka diterit berengkah 1 Julai 2018
KUCHING: Ordinan Nyadung Gis 2016 (GDO) Sarawak deka berengkah dipejalaika kena 1 Julai 2018.
Kepala Menteri Datuk Patinggi Abang Johari Tun Openg, madahka nengah GDO nya nengeri ngarapka bulih mayuh agi gis ke dikena ngerembaika kapasiti ngeluarka elekterik sereta ngeyampatka penumbuh industri di Sarawak.
“Kitai deka nyaga pengawa nyadung gis ba Sarawak. Kena 1 Julai 2018, Ordinan Nyadung Gis 2016 ( GDO) deka berengkah dipejalaika.
“Semua orang tauka kompeni ti ngemeranka pengawa nyadung gis nyengkaum numbuhka palan memproses gis tauka magi tauka loji ‘regasfication’ enggau batang paip dipinta enda tau enda bulih lisin ti dikeluarka ari baruh GDO ti udah dikemendar nitihka kuasa undang diberi Borneo State (Legislative Poers) Order 1963 ngagai menua ti digaga Yang Di-Pertuan Agong ari baruh Artikel 95C, Konstitusyen Perintah Besai.
“Enggau penumbuh GDO, nengeri deka meda mayuh agi kompeni menua tu empu sama enggau ngambi bagi tauka beranakka puku dalam sektor ke pemadu beguna ngagai ekonomi Sarawak,” ku iya.
Abang Johari mansutka pekara nya lebuh bejaku seraya bejadika nyain Sempekat Suwa Tanah entara Bintulu Supply Base (BSB) enggau Bintulu Port Authority (BPA) ti diatur ba sebuah hotel ditu, kemari.
Iya madahka perintah deka ngetuka senario diatu, iya nya Sarawak mayuh gis sereta ulih dijual ngagai menua baka Jepu enggau Korea, tang enda chukup ke guna menua tu empu tauka dikena bejalaika agenda industri nya.
Nyadung Gis (Lisin) Atur 2018 deka netapka prosedur dikena minta lisin enggau yuran ke patut dibayar ngagai pemegai lisin).
Ambika chunto ku iya, penyadung gis ngagai enda ngira orang ke meli (orang tengah enggau orang ke dudi ngena) ba nengeri tu, ari enda ngira bagi kilang ke memproses gis ba Sarawak (ba tasik enggau didarat) nengah batang paip patut minta lisin.
“PETROS deka diberi perintah nengeri lisin ngambika ulih nyadung gis ari loji memproses sereta magi PETRONAS di Tanjung Kidurong.
“Dalam pekara tu, Prinsip Sempekat entara Perintah Nengeri Sarawak enggau PETRONAS mekalka gis ungkup sektor ku asa enggau ukai kuasa ulih diberi perintah nengeri ngagai PETROS,” ku iya.
Kelimpah ari nya Abang Johari mega madahka, perintah nengeri deka ngatur randau enggau semua pengemeran industri minyak enggau gis nyengkaum PETRONAS tengah bulan Mei.
Ku iya, nya dikena ngenukuka polisi baru ti dipejalaika perintah nengeri bejalai enggau lanchar.
“Opis aku ari baruh Unit Minyak enggau Gis deka ngatur randau enggau semua pengemeran industri nyengkaum PETRONS ti deka diatur tengah bulan baru, lalu ke udah ditetapka sebedau bulan Ramadan.
“Sesi randau tu deka nerangka, keterubah, pasal undang-undang enggau atur ngambika ulih nitihka Ordinan Ngelumbung Minyak (OMO), Ordinan Nyadung Gis ( GDO), Kod Tanah enggau Pengeraja Asal sereta Ordinan Rampa Menua (NREO).
“Kedua, pasal penalti enggau nama ti deka dipejalaika nyema enda nitihka atur, lalu ketiga bekaul pekara ke patut dititihka nengah Bup Lalau ti diterangka ngagai pengemeran industri sereta undang-undang enggau atur ti bekaul,” ku iya.
Dalam aum pengarang berita Abang Johari madahka bisi udah peminta bekaul enggau lisin tang chara deka minta lisin mega diterangka nengah randau nya nya tengah bulan baru.
Semua kompeni minyak enggau gis ti bejalaika pengawa ditu enda tau enda bisi lisin ti dikeluarka perintah nengeri nengah OMO Sarawak, laban ti ngemendarka bejalaika operasyen ba nengeri tu iya nya Sarawak.
Pengudah randau tu ila semua pengemeran industri baka kunteriktor, sub-kunteriktor tauka vendor enda tau enda minta lisin nitihka atur OMO, ku iya.