Bepelasarka gaya pemutus pengawa bepilih ke sebedau tu BN ulih menang ketegal pemujur ari Sabah enggau Sarawak

KUCHING: Sabah enggau Sarawak dua buah nengeri ti suah dikangau “deposit tetap” Barisan Nasional (BN), sekalika nya nyadi baru tauka enda ba Pengawa Bepilih Besai Ke14 (PRU 14)?

Sabah enggau Sarawak ti nyadi ‘deposit tetap’ nyelamat sereta mai pemujur ketegal menang ba pengawa bepilih besai 2008 enggau 2013 BN ngagai UMNO.

Taja pan BN enggau UMNO menang enggau majoriti mudah ti disaup enggau pemujur menang di Sabah enggau Sarawak, tang ku Sapit Ketuai Kluster Politik, Pengelikun enggau Hal Ehwal Antarabansa Majlis Profesor Negara (MPN) Prof Dr Jayum Jawan, madahka UMNO enggau gempung perintah mega bisi kena pangka.

Ku iya ti mega penganalisis politik madah, UMNO enda ulih agi teulihka majoriti mudah nengah undi Melayu aja di Semenanjung baka ngelama tu, belabuh ari maya Malaya merdeka ba taun 1957 enggau penumbuh Malaysia ba taun 1963.

“Kati Sabah enggau Sarawak deka terus nyelamatka BN enggau UMNO ari penganchur ketegal diserang PH dalam Pengawa Bepilih Besai Ke-14 (PRU14) tu legi?,” ku iya.

Bepelasarka gaya orang ngundi ba taun 2008 enggau taun 2013, kelimpah ari sentimen besai dalam timpuh beberapa taun sebedau pengawa bepilih besai ke sekali tu, saut iya nyemetak.

Sabah enggau Sarawak ku iya, deka nyadi kebuah pengudah PRU 2018 tu ila, BN deka megai kuasa baru enggau UMNO ti megai ke-14 kali.

“(BN) dipelaba deka numbuhka perintah majoriti mudah ti disukung mayuh penuduk ti dimenang chalun BN ba kededua nengeri Borneo nya.

“Sebaka enggau dua pengawa bepilih besai sebedau tu, Sabah enggau Sarawak deka menang nyauka sebaka penyampau penuduk enggau ba taun 2013,” ku iya.

Nitihku iya, ba Sabah engka bisi ubah mimit ngagai dua tauka tiga sitak, lalu nambahka nya BN ulih melabaka menang ba 20 ngagai 21 ari 25 sitak parlimen ti diperebutka di nengeri nya.

Di Sarawak, Jayum madahka BN ulih melaba teulihka penyulut ti sebaka ari parti komponen, ke lalu ulih nandu baru penyulut BN Sarawak ba taun 2013.

Kebuah pia, BN perintah menua enggau nengeri ulih nyamin semua semilan sitak parlimen ti tebal agi Melanau/Melayu Islam ulih ditan lalu chalun sida ari Parti Pesaka Bumiputera Bersatu (PBB), dipelabaka ulih menang enggau nadai mayuh penanggul.

PBB nadai penanggul besai dalam komuniti nengah iring ketuai dalam parti nya, kelimpah ari pengawa nyerahka pengawa ngiring PBB ari niang Pehin Sri Adenan Satem ngagai Datuk Patinggi Abang Johari Tun Openg dipejalaika enggau lanchar.

Taja pia Jayum ti mega Professor, Politik & Perintah, Universiti Putra Malaysia madah, dipelabaka sekeda endur angat tang enda meri penanggul besai.

Bejaku baru, iya madahka dalam 11 sitak parlimen ti tebal agi bansa Iban, siti tauka dua sitak nya engka angat laban bisi berebutka sitak nya.

“Chunto iya, PRS dipelaba deka milih chalun baru di Selangau kena nganti penyandang, Joseph Entulu, ke nyadi sapit presiden parti sereta siku menteri ba renggat perintah menua,” ku iya seraya madahka Entulu udah dikelaungka presiden parti Tan Sri Datuk Amar James Jemut Masing.

Lebuh ke ngenang dalam raban bansa Bidayuh, iya melabaka nadai isu besai sereta agi ulih ngetanka sitak ngarika BN.

Lalu dua sitak parlimen ti tebal diuan Orang Ulu mega nadai isu baru ti besai tang laban ketuai Parti Keadilan Rakyat (PKR) Sarawak datai ari raban bansa nya, ulih dipeda ngeruga BN mimit ti deka ngetanka kededua sitak nya, ku iya.

Berebak enggau tu lebuh ngenang enam sitak ke diarika pengari China iya nya lima ari DAP enggau siti PKR, Jayum madahka dipelaba bisi mar mimit ba BN laban nadai mayuh pekara ke ulih dikereja dikena ngambi nya baru.

Raban bansa China di Sarawak, baka orang China di Semenanjung, udah mutus ati deka ngelengkaka parti China dalam gempung perintah.

Laya entara SUPP (Parti Sa’ati Rakyat Sarawak), ti bisi mayuh kaban ari pupu bansa tang betuaika pemesai China, lalu repik parti nya UPP (Parti Rakyat Bersatu) enda nulung peluang sida ngulihka baru sukung enggau penuduk China.

Taja pan kededua parti udah nyain sempekat madah diri deka gawa begulai, raban bansa China udah mutus ati enggau nyengala deka ngelengkaka iring kededua parti.

Ba penemu Jayum, diatu nadai kebuah Sabah enggau Sarawak ngembuan runding deka ngelengkaka diri ari BN. Ari taun 2008 bisi 12 iku menteri datai ari kededua nengeri taja pan tebal enda megai portfolio ti besai.

Ngenang pasal Sarawak, iring niang Adenan disambut manah rayat Sarawak enda ngira bansa, ti diganti Abang Johari ke nyadi Kepala Menteri Ke-6, bejalaika pengawa enggau manah naka ke diatu.