Enti diperati leka jaku ‘Sekolah Rendah’ nyau baka sekula ke enda berat ngujungka kurang dikeibuh ari sukut agih belanja
SERIAN: Menteri Pelajar, Sains enggau Pansik Teknologi Dato Sri Michael Manyin Jawong merambu ngasuh sekula primari ditukar nama ngagai ‘Sekolah Utama’ ( sekula besai), mandangka pemerat sekula bansa nya ke nyadi palan alai nembiak berumur tujuh ngagai 12 taun belajar.
Iya bepenemu leka jaku ‘ Sekolah Rendah’ iya ke dikena diatu, enti disalin nyadi sekula baruh, nyau baka sekula ke enda berat, nyangka nya mega ke ngasuh sekula ke udah tuai, lama tauka udah jai enda dikemerat sereta enda diberi agih belanja.
“Enti aku bisi kuasa, aku deka nukar leka jaku nya ngagai Sekula Besai (Sekolah Utama) ke ngayanka pemesai reti, ngambika mayuh agi ungkup deka diberi ngagai sekula lalu semina pengajar ke tinggi agi pengulih dianjung ngajar ba sekula nya,” ku iya madah lebuh bejaku ba atur pengawa makai lemai ti diatur Gerempung Apai Indai enggau Pengajar (PIBG) SK Krusen, di Kam- pung Krusen Kranji, kena malam hari Enam minggu nyin tadi.
Manyin, ti mega nyadi Kaban Kunsil Nengeri (ADUN) Tebedu madahka leka jaku English nyebut ‘primary school’ udah madahka pemerat tikas dalam pelajar sereta pemansang nembiak mit.
Iya madah ari perati iya maya ngelawa menua China tu tadi, sekula primari di China udah betatika pengawa ngajar sereta ngelatih nembiak napi empas dalam abad ke-21.
Trend bansa tu ku iya sebaka enggau di menua Eropah, ngembuan pemerat ke sebaka di sekula primari lalu semina pengajar ke bisi ‘ Masters degree’ diambi gawa ngajar nembiak.
“Nyangka ba sentang tu Malaysia enda ngaga pengawa bansa tu, ke enda ngemeratka sekula primari. Tang, kitai agi bisi jam ngemetulka pekara tu,” ku iya.
Ba pekara ke bekait enggau pelajar, Manyin madah iya tetap majakka pengawa iya bejaku pasal pelajar, sereta majak ngelalau apai indai kelebih agi di menua pesisir beratika bala anak sida iya deka nyadi orang ke mujur dalam pelajar.
Iya madah tu ketegal pelajar nyadi kunchi mechahka timpuh beulang dalam pen- anggul ruang bilik ke meskin. Ba pekara tu ku, iya madah iya deka ngiga jalai ngemanahka agi perengka guna sekula di menua tu.
Ba lansa bukai, iya madah iya nemu pasal jaku anu tauka ngelesei ke digaga orang ba iya nengah media rama kelebih agi baka Facebook, ke nganu chara iya ngemutarka pengawa iya.
“Pelaba aku di Facebook, nyangka bisi lebih 1,000 timbal ke ngasuh aku badu nyadi YB (pengari rayat), madahka aku tu enda tekerejaka pengawa aku sereta mayuh macham bantah bukai.
“Nyadi siku YB, sigi biasa nerima timbal bansa tu ari orang ke ngumbai sida iya landik lagi. Tang aku ulih madah ngagai kita, orang bansa tu semina nemu meri penemu sida iya aja tang enda ulih ngaga pengawa nya enti pengawa nya diberi ngagai sida iya,” ku iya.
Taja pia, iya madah pengirau ati meda sekeda gaya ulah ke enda manah ke dikembuan ulih sekeda orang ari menua tu empu, ke ngemaruh sereta nganu orang bukai ke deka ngereja pengawa manah ke komuniti.
Ba atur pengawa makai lemai nya, Manyin besemaya deka meri geran Perintah RM300,000 kena miki sereta ngemanahka perengka guna sekula SK Krusen.
Sama bisi enggau ngulu atur pengawa nya, Pegawai Pelilih Menua Serian, Lim Hock Meng, Sapit Chairman Opis Kunsil Pelilih Menua Serian, Dr Simon Sinang Bada, Sekretari Opis Kunsil Pelilih Menua Serian, Constantine Noeb, tuai pupu raban bansa enggau kaunsilor.