Rayat di menua ulu nadai kala dikelaung ari servis perintah
SARATOK: Perintah nadai kala ngelaungka rayat di menua ulu sereta seruran berundingka chara dikena nentuka servis perintah ulih datai ngagai peranak ti begunaka iya.
Kaban Kunsil Nengeri (ADUN) Kalaka Datuk Abdul Wahab Aziz madah program Palan Transformasyen Komuniti Mindah Kin Kitu (Mobile CTC) nyadi inisiatif dikena meri jalai ngagai peranak kelebih agi sida ke diau di menua pesisir enggau menua ulu ngambi ngemuntangka sida nerima servis ari perintah.
Kenu ku iya, pengawa ngatur program Mobile CTC mujur ngenyemakka agi perintah enggau rayat sereta nyediaka bemacham servis ungkup komuniti di menua.
“Ukai semua rayat kelebih agi sida di menua ulu ulih ngelawa Palan Transformasyen Mengeri ketegal jauh sereta beberapa penanggul bukai nyengkaum perengka pengangkut enggau ungkus pejalai.
“Nengah program tu, sistem ngenataika pengawa perintah ulih dipejalai enggau jampat sereta terus ngagai rayat ti begunaka servis ti sikar sereta ngemai pangka,” ku iya.
Iya mansutka jaku nya lebuh bejadika ba Pengawa Bejadika Program Mobile CTC Saratok di Panggau Besai Sejiwa Senada Saratok kemari.
Berebak enggau program nya, Opis Bomba enggau Penyah Penusah Sarawak dipadu menggi gelar Champion Perais Bangsal Mandang Pemadu Manah Sejiwa Senada Saratok.
Penuduk kedua dipenggi Lembaga Pembangunan dan Lindungan Tanah (LCDA) lalu penuduk ketiga pulai ngagai Chairman Penyer- akup enggau Pengintu Tanah Sarawak (SALCRA).
Champion nerima perais mata duit RM1,000, lumur dua RM700 lalu ketiga RM500.
“Sedarka penekul enggau penanggul ditapi rayat di nengeri tu, Perbendaharaan Malaysia Sarawak udah ngemesaika konsep program Mobile CTC belalauka konsep asal iaitu Program Mobile CTC Bas ngagai Mobile CTC Bot ba endur ti enda ulih dilawa nengah jalai alun lalu semina ulih dilawa ngena perengka pengangkut sungai.
“Seraya, konsep Mobile CTC Roadshow mega bisi dipejalai enggau ngemai bas enggau van mindah kin kitu, bela ngetu ba endur strategik ngambika rayat ulih nerima servis lansung ari ejensi perintah nya,” ku iya.
Ku iya, pemutus Perbendaharaan Malaysia Sarawak, Opis Menteri Wang Malaysia ngatur Program Mobile CTC di Saratok nyadi pemutus ti betul ngambika peranak di menua tu nerima servis bekaul perintah enggau muntang sereta jampat.
Iya ngarapka peranak diau Saratok ngambi peluang memanah ngulihka servis ti disedia sereta ngaul diri ba aktiviti bisi diatur.
“Kami ngenang pemanah pengawa Perbendaharaan Malaysia Sarawak, Opis Menteri Wang Malaysia laban udah milih Saratok nyadi menua kedua ngatur Program Mobile CTC ngemeranka konsep bas,” ku iya.