Beri peluang ngagai Anyi gawaka rayat sepenggal agi

MARUDI: Kaban Kunsil Nengeri (ADUN) Mulu Dato Gerawat Gala minta rayat di Baram meri awak ngagai penyandang Parlimen Miri (P220), Anyi Ngau nampung sepenggal agi servis iya.

Gerawat ke mega Sapit Speaker Aum Kunsil Nengeri (DUN) madah, pekara tu kebuah pia laban iya deka mantu ngelancharka agi pengawa pemansang ti jampat agi ngagai sitak Baram.

Ku iya, Baram ti mungkur tiga sitak Bepilih Kunsil Nengeri ( DUN) iya nya Mulu dibaruh pegai iya empu, seraya DUN Telang Usan (Dennis Ngau) enggau Marudi (Datu Dr Penguang Manggil) deka bebendar agi gawa ngemai mayuh agi pemansang.

Ku iya, Anyi nyadi chalun ti dikirai Parti Demokratik Progresif (PDP) nyadi chalun Barisan Nasional ungkup P.220 Baram maya Pengawa Bepilih Besai Ke-14 (PRU14) ti deka datai.

“Iya empu ari Tim Baram nyengkaum aku empu, Datu Dr Penguang enggau YB Dennis deka terus gawa. Nya alai aku dekaka rayat Baram seruran nyukung iya,” ku iya bejaku rambau Program Warga Ceria di Rh.Ridap Kampung Sungai Pasir Marudi, Hari Enam tu tadi.

Ku Gerawat nambah, ari gempung pengawa empat iku pengari rayat iya nya Anyi, Dennis, Penguang enggau iya empu deka ngangkatka Baram ba pelasar ti betul nuju pemansang, nya alai iya endang patut ditan.

Ngelansa sillik ku iya, Puyut-Lubok Nibong udah tebilang nyadi kubu tegap BN di N.78 Mulu, nya alai rayat patut ngetanka Kubu BN tu.

Ku iya, antara projek Perintah BN ungkup rayat Marudi enggau Puyut- Lubok Nibong; Jalai Miri- Marudi ti benung digaga, Jematan Marudi beungkus RM84 juta ti baru dilanchar Menteri Besai Datuk Seri Najib Razak, Projek Bekal Ai Beresi Puyut-Lubok Nibong deka digaga enda lama agi iya nya tinda nyangka pansut sebedau PRU-14.

Ba lansa bukai, Gerawat meri terima kasih ngagai JASA, Komuniti Sihat Perkasa Negara (KOSPAN) Sg Pasir enggau bala staf Sepital Marudi ba pemujur sida ngatur Program Warga Ceria ti ngaul 13 KOSPAN di PuyutNibong sereta nyauka 500 iku pesereta.

Iya mega bisi nyuaka geran Projek Mit Pemansang Menua Pesisir (MRP) ngagai 11 bengkah gempung, komiti enggau sekula, kesemua penyampau manggai RM165,900.

Sama bisi datai Anyi, Tua Rumah Ridab Selat, pengari ketuai opis, bala ketuai raban bansa sereta tuai rumah.