RM1.35 juta dikena nambah lima buah tadika KEMAS ba DUN Nangka
SIBU: Sepenyampau RM1.35 juta agih udah dikemendarka dikena nambah lima buah agi tadika KEMAS ba Kunsil Nengeri (DUN) Nangka taun tu.
Menteri Muda ba Opis Kepala Menteri (Pemansik Sains enggau Bioteknologi) Dr Annuar Rapa’ee madah, agih nya diungkupka nengah Program Transformasyen Menua Pesisir (RTP).
“Tebal agi tadika Kemas ba DUN Nangka nyiwa endur orang tang aku udah numbuhka mayuh tadika kemas di rumah panjai baka di Rumah Asing, Rumah Eddy Jemat enggau Rumah Philip sereta mayuh agi.
“Nya alai, taun tu aku udah ngemendarka RM1.35 juta dikena ngaga lima buah agi tadika Kemas di DUN Nangka ditu,” pia ku iya madah.
Iya mantaika pekara nya maya bejadi pengerami nutup Karnival Kemas4U Sitak Sibu ba Star Megamall ditu, kilah ensana.
Berebak enggau pengerami tu, Annuar ti mega Kaban Kunsil Nengeri ( ADUN) Nangka mai rayat di Sibu bela besaup nentuka Parlimen Sibu ulih diambi Barisan Nasional (BN) maya pengawa bepilih ti deka datai.
“Kitai ngarap rayat ditu lebih agi Bumiputera meri sukung ti tegut ngagai sapa-sapa chalun ari BN maya hari ngundi ba PRU14 tu.
“Kitai meseti nentuka sapa ke nyadi perintah diatu mengkang disukung ngambika agi nyadi perintah,” ku iya sambil madah udah maya iya BN diatu nyilih penuduk parti penyakal megai Sibu.
Ku Annuar, mayuh orang diatu melabaka BN ulih menang ba Parlimen Sibu serak tu.
“Enti BN amat menang tu deka nyadika perais ti chukup besai ngagai kitai di Sibu ditu.
“Kebuah pia laban kitai ditu enggai agi dipegai parti penyakal laban sekumbang sida ke megai kitai mayuh awak enggau pemansang ti patut diasaika tebuai baka nya aja ketegal nadai agih ari perintah,” pia ku iya.
Annuar madah, Bumiputera ditu enda ibuh ngira sapa chalun ngarika BN ba Parlimen Lanang maya PRU tu ngambika manifesto BN mujur dipenyadika udah tu ila.