Ngena teknologi tu pengawa jampat agi ditembu, ungkus mimit agi enti dibandingka enggau chara ke lama
KUCHING: Perintah nengeri deka ngemansangka sektor pengawa berumah ba Sarawak ngena teknologi baru iya nya Sistem Binaan Industri (IBS) ti beratka gaya pemanah rampa.
Kepala Menteri, Datuk Patinggi Abang Johari Tun Openg madahka chara IBS nya mega lebih jampat enti dibandingka enggau chara lama kelimpah ari ngena pengereja pengawa ti mayuh.
“Baka sekula tu (Tabika KEMAS) ngena kuasa solar ti ngujungka enda ngeluar belanja besai. Udah nya rumah sekula tu digaga ngena teknologi baru, ambika banding pengangat ba luar rumah enda ulih tama ke dalam rumah.
Teknologi baru baka dikena ba sekula tu deka meri peluang ngagai bala anak kitai belajar enggau lantang.
“Aku berunding udah tu kitai deka ngaga rumah ti baka nya (ngena teknologi baru). Kitai minta bantu sida CIDM ngelatih anak kitai baka ni ngaga rumah ti ngemeranka teknologi tu (IBS), awakka sida ulih nyadi orang dagang ba pengawa begaga nguna teknologi tu,” ku iya.
Abang Johari mansutka pekara nya lebuh bejaku ba pengerami nyuaka projek ngaga baru Tabika KEMAS, Kampung Kudei Baru ba Kampung Kudei Baru nya, lemai kemari.
Nitih ku iya dipelabaka teknologi baru nya deka dipejalaika ba perambu projek pengentap baru ke diper- ambu deka di gaga ba Sungai Bedaun.
Ku iya, palan pengentap baru nya deka diungkupka ngagai orang Segedup enggau Sungai Maong nyengkaum peranak ari Kampung Kudei.
“Kitai deka muka tanah baru endur ngaga palan pengentap baru tu tang ke dulu digaga kitai iya nya ngaga jalai alun dulu sebedau ngaga rumah.
“Aku deka ngaga jalai raya baru entara Stapok nuju ke Sungai Maong, lalu ari Sungai Maong disambung ngagai Segedup,” ku iya.
Sama bisi datai ba pengerami nya kemari, chalun BN PRU14 ba sitak Petra Jaya Datuk Seri Fadillah Yusof enggau kebukai.
Aku berunding udah tu kitai deka ngaga rumah ti baka nya (ngena teknologi baru). Kitai minta bantu sida CIDM ngelatih anak kitai baka ni ngaga rumah ti ngemeranka teknologi tu (IBS), awakka sida ulih nyadi orang dagang ba pengawa begaga nguna teknologi tu. Datuk Patinggi Abang Johari Tun Openg Kepala Menteri Sarawak