Sibu Street Art Festival deka diatur ari 5-13 Mei ngangkatka ‘Homely Sibu - Heartland of Sibu’
SIBU: Sibu Street Art Festival 2018 deka nyungkakka agi imej Sibu nyadi sebuah mengeri ti manah ari sukut main asal enggau hari besai pupu raban bansa.
Chairman Opis Kaunsil Sibu (SMC) Datuk Tiong Thai King madah, festival nya mandangka pemanah mengeri Sibu nyengkaum ba pekara sejarah enggau jalai pengidup rayat ditu.
“Kelimpah ari nya, tuju festival tu diatur laban deka nyungkakka agi pengerindu begulai enggau pangan diri nengah pengawa mai bala artis menua tu mandangka pengelandik sida ba art seririh enggau rambai jaku ‘Homely Sibu - Heartland of Sibu’,” pia ku iya madah.
Iya mantaika jaku tu maya bejadi Sibu Street Art Festival 2018 ba Dataran Bandar Sibu Fasa I, empai lama.
Festival nya diatur begulai F1 Live Sounds& Lights Sdn Bhd.
Bela datai maya tu iya nya Sapit Chairman SMC Rogayah Jamain, Chairman Komiti Pengatur Festival Kaunsilor Wong Hie Ping sereta bala bukai.
Festival tu diatur berengkah 5 Mei nyentuk 13 Mei tu ti digulu 20 iku artis menua tu ti mandangka pengelandik ba ‘street art’, ‘busking’, ‘mural,’ bazar kreatif’ enggau ‘teater mini’.
Ku Tiong, kenyau ari kelia, pengelandik ba seni besai reti ngagai rayat menua Malaysia.
Iya madah, kelimpah nyadika kelai ngagai penyerakup enggau sosialisasi, seni mega nyadika pengawa enggau pengerindu ke digaga maya lepa.
“Ketegal nya, kena pengelandik kita sepemanjai festival tu diatur.
“Penatai kita ukai semina ngemujurka agi festival tang bela mandangka rayat di mengeri Sibu nangam penyerakup sereta ulah rindu begulai enggau pangan diri,” pia ku iya madah.