PIBG ngembuan tanggungpengawa ngempung apai indai di sekula

SIBU: Kenyau ke iya ditumbuh ba baruh Akta Pendidikan 1996, Gerempung Apai Indai enggau Pengajar ( PIBG) seruran bejalaika tanggungpengawa ti besai ba sistem pelajar menua Malaysia.

Nitihka dipadah Sapit Chairman Lembaga Pengurusan SMK Tung Hua, Dr Micheal Wong Soon Ting, PIBG ngembuan tanggungpengawa ngempung apai indai di sekula ba tuju ngangkatka pekara pengelikun enggau pelajar bala nembiak.

“Gerempung tu nyadi platform ke manah ngagai bala apai indai enggau pengajar nyaup sekula mujur agi sereta bejalaika pengawa enggau manah,” pia ku iya madah maya Pengerami Mi- lih Komiti PIBG sekula nya ungkup renggat 2018-2019 berebak enggau Pengerami Hari Pengajar ba sebuah hotel ditu, empai lama tu tadi.

Maya tu Wong Ching Diak dipilih nyadi chairman PIBG SMK Tung Hua.

Ku Dr Wong, PIBG mega nyadika pelasar sistem ba sesebauh sekula dikena nentuka sekula nya diatur enggau mujur.

“PIBG tu dikena kitai nyaup nyediaka perengka infrastruktur enggau rampa laman sekula ke mujur ba bala nembiak enggau pengajar di sekula,” ku iya.

Iya madah, bisi mega piak salah peragam nyangka PIBG dilempaika enggau pengawa nyaup sekula ngiga turu.

“Turu tauka pemeri ngagai sekula selalu diberi ati diri tauka enda dipejal,” pia ku iya nerang.

Kelimpah ari nya, Dr Wong mega madahka reti penyerakup antara semua apai indai enggau pengajar nyukung program ke diatur sekula.

Prinsipal sekula nya, Goi Ngouk Yew ba jaku iya maya tu minta apai indai semampai ngemeratka guna pelajar anak sida.

Iya madah, kaul antara pangan diri bela nentuka nembiak ngembuan ulah ke manah sereta nyadi orang ti angkunka menua diri.

“Enda ulih dikeenggai pemanah kaul apai indai enggau pengajar ngemujurka pemanah siku-siku nembiak sekula,” ku iya madah.