Rayat patut ngambi peluang ba pemansang ti disediaka Perintah
SEBUYAU: Rayat patut ngambi peluang ba pemansang ti bisi disediaka ulih Perintah kelebih agi dalam pelajar kena beratika kitai bela ngembuan pemujur datai ke jemah ila.
Menteri Muda Jalai Pesisir Datuk Julaihi Narawi madah, ketegal nya, apai indai kelebih agi bala nembiak sekula enda tau enda ngena perengka guna pelajar ti bisi disediaka.
“Pengawa ngaga sekula baru, Sekolah Menengah Kebangsaan (SMK) Sebuyau di sitak Bandar Baru Sebuyau ke deka berengkah enda lama agi, mandangka pemendar Perintah beratika pemansang pelajar kelebih agi di pelilih menua mit Sebuyau,” ku iya.
Iya madah munyi nya lebuh bejaku ba atur pengawa nutup Program Berambeh Perbadanan Tabung Pendidikan Tinggi Nasional (PTPTN) DiHatiku di Dewan Seri Ruai SMK Sebuyau ditu, bedau lama tu tadi.
Ketegal nya, Julaihi ngarap apai indai enggau bala nembiak sekula beratika sida iya empu netapka tuju sereta pemujur ke dudi hari ila.
Julaihi ti mega nyadi Kaban Kunsil Nengeri ( ADUN) Sebuyau, ba lansa bukai madahka atur pengawa benung digaga diatu beratika Giat Mara ulih dipindahka pulai baru ngagai Pelilih Menua Sebuyau ngambika ulih meri mayuh agi peluang sereta ngepunka pendiau ke menyana agi ngagai sida ke udah abis besekula. Ba jaku iya mega, iya meri puji sereta terima kasih ngagai PTPTN ke udah ngaga program Program Berambeh PTPTN DihatiKu lalu nga- rapka PTPTN deka mantu mayuh agi nembiak nyam- bung pelajar sida iya ngagai renggat ke tinggi agi.
Kelimpah ari nya, iya mega ngarapka apai indai sereta bala nembiak enggau naka ulih ngena bantu perengka guna ti bisi disediaka ulih PTPTN.
Program Berambeh PTPTN DihatiKu ti digaga dalam kandang sehari nya, nyengkaum bekunsika pemadah, Licha Motivasi kelimpah ari nerima tabung ari apai indai ke Tabung PTPTN ke anak sida iya.
Sama bisi enggau ngulu atur pengawa nya, Sapit Ketuai Eksekutif, Atur enggau Operasi PTPTN Mastura Mohd Khalid, Kepala Pengajar SMK Sebuyau Hasbi Ancheh enggau sekeda temuai ti dibasa bukai.