Projek pemansang tu dikearap ulih ngangkatka Lubok Antu nyadi sitak ti moden, nambahka penatai pemisi
KUCHING: Kepala Menteri Datuk Patinggi Abang Johari Tun Openg ngemendar sekeda projek ba penyampau RM26.6 juta dikena ngemansang Lubok Antu.
Projek pemansang nya ku iya dikearap ulih ngangkatka Lubok Antu nyadi seiti kandang endur ke moden lalu ngangkat sosio ekonomi rayat.
“Keterubah, aku ngemendar projek ngaga mini stadium di Engkilili ke beungkus RM8 juta.
“Ba sentang pengawa betanam betupi, kitai meseti bisi jalai alun ke menyana ngambi ulih dikena ngemansut asil.
“Berindik enggau nya, perintah meri pemendar projek ngaga jematan konkrit meraka Sungai Batang Lupar ari Merebong, Engkilili ngagai Pasar Engkilili ke beungkus RM13.6 juta,” ku iya.
Abang Johari mansutka jaku nya rambau bejadi Program Sejiwa Senada 2018 Lubok Antu ke diatur di Dataran Keling ditu, kemari.
Kelimpah ari nya, iya mega ngemendar projek ngangkatmanah ‘waterfront’ Lubok Antu ke beungkus RM5 juta.
“Seharitu aku ngemendar pojek ba penyampau RM26.6 juta dikena ngaga ubah ba Lubok Antu,” ku iya.
Ba pengerami nya, iya mega netapka palan pengerami Dataran Keling diangkat nyadi ‘Town Square’ Lubok Antu.
Ngenang kaul bukai, Abang Johari mega madah Perintah Nengeri deka mungkal projek ngaga jalai Nanga Kesit-Ulu Lemanak- Engkari pemanjai 25 km.
Ku iya, projek ke beungkus RM120 juta nya patut nerima agih belanja ari Perintah Besai.
“Projek tu patut digaga Perintah Besai tang sida bedau meri belanja.
“Ketegal nya, awakka Perintah Nengeri ngeluarka belanja dulu. Kitai ngaga fasa keterubah ti begunaka belanja RM50 juta.
“Udah nya jemah, Perintah Besai melankin jalai tu,” ku iya seraya madah jalai nya deka nyendia atur penyambung ngagai 3 buah sekula, 3 klinik sereta urung 10 buah rumah panjai. Iya mega madahka Perintah Nengeri deka ngeluarka belanja RM45 juta dikena ngaga jalai Nanga LisomMara ba pemanjai 12 km.
Ba program kemari, Abang Johari bisi nyuaka surat pala tanah warta rezab komunal bumiputera nitihka Seksyen 6 Kod Tanah Nengeri.
Lima genturung pendiau ari Lubok Antu enggau 13 ari Undop nerima surat pala tanah nya.
Kelimpah ari nya, iya mega bisi nyuaka Skulasip Yayasan Sarawak ngagai 11 iku penerima.
Bela datai Sapit Kepala Menteri Tan Sri James Masing, Sekretari Perintah Nengeri Tan Sri Mohd Morshidi Abdul Ghani, Menteri Muda Industri enggau Beranakka Puku( Adun Batang Ai) Malcolm Mussen, Menteri Muda Pengelantang Komuniti( Adun Simanggang) Datuk Francis Harden Adun Engkilili Dr. Johnnical Rayong enggau Datuk Patinggi Alfred Jabu.
Ba sentang pengawa betanam betupi, kitai meseti bisi jalai alun ke menyana ngambi ulih dikena ngemansut asil. Datuk Patinggi Abang Johari Tun Openg Kepala Menteri