Perintah nengeri nadai penanggul ngaga projek ti begunaka belanja ke besai

LUBOK ANTU: Perintah Nengeri nadai penanggul ngemujur projek pemansang ke begunaka belanja ke besai, ku Kepala Menteri Datuk Patinggi Abang Johari Tun Openg.

Bejaku rambau bejadi Sejiwa Senada 2018 di Lubok Antu kemari, iya madah Sarawak bisi penatai pemisi tambah iya nya ari minyak enggau gis.

“Aku udah ngambi syer 25 peratus ba MLNG3 ba bulan ke udah lalu diatu Sarawak bisi 25 peratus.

“Ari MLNG 3 nya taun tu kitai bisi dividen ba penyampau RM2 biliun ke alai aku deka nentuka dividen tu diberi pulai ngagai rayat.

“Ketegal tu mih aku berani ngemendar projek ti begunaka belanja ke besai,” ku iya seraya madah dividen nya diterima nint- ing taun.

Ba program kemari, Abang Johari ngemendar projek penyampau RM26.6 juta dikena ngemansang Lubok Antu.

Dulu agi ari tu, iya mega udah ngemendar projek ba penyampau RM173 juta di Igan enggau RM57 juta di Selangau kelimpah projek di pelilih bukai.

Ngenang kaul ke sama, iya madah semua projek pe- mansang nya deka dipantau lalu iya empu deka mantaika pemujur projek ba program Sejiwa Senada ke deka diatur dalam timpuh dua taun setengah ari tu.

“Kitai ngatur program sejiwa senada dalam timpuh 2 taun setengah sekali.

“Ba maya nya ila aku deka mantaika ngagai rayat sentang pemujur semua projek ke udah dikemendar kitai,” ku iya.