Pengawa bekimpin likun mandangka penuai proses demokrasi di nengeri tu
KUCHING: Kimpin Pengawa Bepilih Besai Ke14 ( PRU14) ba Sarawak ngayan sereta beratka pemaik, pengelantang enggau penyerakup, setipak enggau nengeri tu dikelala ba tiga pekara nya.
Pemesai parti politik sereta semua chalun bekimpin ngena chara profesional, beratka pemaik sereta pengelantang, nadai nempa provokasi enggau ulah negatif ke ulih ngeruga kimpin.
Ari segi kereban ke dikena kimpin PRU14 mega, lebih ngagai chara lama baka ngena menira, poster enggau kain rentang dikena ngerami kimpin, kelimpah ari mantaika manifesto sereta ngatur licha.
Bepelasarka penerang Polis Diraja Malaysia ( PDRM) Sarawak, nyerumba PRU14 ba Sarawak bisi 692 peminta permit ngatur licha ari parti ke minta pilih ti nyengkaum 486 peminta ari Barisan Nasional (BN).
Ke bukai nya nyengkaum peminta permit ari parti ukai perintah iya nya PKR bisi 99 peminta, DAP (70); Ngati Kediri ( 17); STAR ( 11), Sarawak Peace Party- SPP (7), PAS (1) enggau Parti Bumi Kenyalang - PBK (1).
Menira, poster enggau kain rentang parti ke minta pilih enda ngira sekalika ari Barisan Nasional tauka parti penyakal semua ulih diengkah begulai, ke lalu ngerichahka pengawa bekimpin.
Kelimpah ari pemesai parti, parti sereta chalun, bala pengundi mega nemu chara tauka atur bekimpin kelimpah ari ngembuan runding ti tuai agi, setipak enggau menua ti ngemeranka demokrasi.
PRU14, SPR ngelekatkka 11 hari timpuh bekimpin, berengkah ari pengudah Hari Ngantung Nama kena 28 April ngagai hari ke penudi tengah malam tadi.
Nitih ku Tuai Rumah ( TR) Genturung Pendiau Kudei Baru (Iban), Tr Sangi Abu, 49, madahka pengawa bekimpin PRU14 dalam ‘zon selesa’, kimpin ngena chara integriti sereta lebih rasional.
Ku iya, maya bekimpin nadai penyarut tauka besengki jaku sekalika entara parti ke minta pilih, chalun enggau pengundi.
“Kitai di serata Sarawak bekaul enggau pengawa bekimpin tu, laban runding kitai deka ngetanka penyerakup, rinduka penyerakup, rindu begulai enggau pangan diri, (kimpin nyerumba bepilih) nadai utai ke ngasuh belaya.
“Lalu chara kitai nyukung parti ke dipilih mega nadai ngasuh belaya sereta nadai nanggul ba kitai laban tu hak siku-siku milih parti.
“Ambika chunto ba kami dalam sitak Parlimen Petra Jaya, lebih agi ba genturung pendiau kami dalam timpuh kimpin aku nadai meda orang becharikka barang kimpin enggau ke bukai,” ku Tr Sangi lebuh ditelefon Utusan Borneo.
Nambahka nya Tuai Rumah Genturung Pendiau Stampin Baru, Kuching, Tr. Jakup Buan bepenemu kimpin PRU14 dipejalaika enggau penuh pemaik sereta pengelantang.
Lebuh dikerandau nengah telefon ku iya, dibandingka enggau dulu kelia, kimpin pengawa bepilih jeman diatu jauh bida baka ulih nerima penemu pangan diri.
“Kemaya hari tu enti maya pengawa bepilih, maya bekimpin endang diatur enggau manah dalam pemaik sereta pengelantang.
“Laban kitai ngena pen- emu baru diatu ukai ngena penemu kelia ti berebut tang diatu kitai ulih bebatak asur enggau pangan diri. Nadai kebuah belaya tauka charut laban kimpin tu semina beberapa hari aja, enti belaya nyau seumur idup belaya tu nadai pematut.
“Baka dalam Parlimen Stampin, dalam timpuh kimpin PRU14 pengawa bekimpin bejalai enggau lanchar sereta nadai penyarut,” ku iya seraya madahka pemaik, pengelantang enggau penyerakup enda tau enda dijaga.
Connie Stephen, 50, asal ari menua Sri Aman madahka pengawa bekimpin kelebih agi ba mengeri endang mekuh sereta ngena semua kereban kimpin ti dikemendarka.
“Kimpin ba menua kitai lebih agi ba mengeri ari perati aku endang diatur ngena chara ti dalam pemaik enggau pengelantang.
“Kededua piak parti endang amat bebendar ngena semua kereban kimpin ke dikemendar ( dikena narit ati pengundi),” ku iya seraya madahka disengkaumka sekali pengawa bekimpin ba nengeri tu diatur enggau lanchar.
Kelimpah ari nya Sang Sanjan, 39, asal ari Tatau sepenemu madahka pengawa kimpin dipejalaika dalam pemaik enggau pengelantang.
Lebuh dikerandau ku iya, taja pan ba sekeda endur ke dikumbai sitak angat baka Parlimen Selangau tang pengawa bekimpin endang lanchar sereta nadai penyarut.
“Ba sitak Selangau taja pan mayuh isu dibantai maya PRU tu baka isu tanah, penanggul dalam parti enggau isu ke bukai tang maya kimpin diatur nadai penyarut, kimpin diatur enggau lanchar,” ku iya siku pengereja pengawa ba Gerempung Kayu Ramu Sarawak.