Bemacham inisiatif bisi dipejalai perintah nengeri tu ngambika sida seruran regas sereta ulih besemekih ngerebut peluang
BETONG: Perintah nyendiaka mayuh peluang dikena meransang raban nembiak enggau bemacham inisiatif ngambika sida seruran regas sereta ulih besemekih.
Kaban Kunsil Nengeri (ADUN) Layar, Gerald Rentap Jabu madahka perintah nyediaka bemacham peluang ungkup rayat ngulihka belanja pengidup ti meruan agi kelebih agi raban nembiak ngembuan pengelebih enggau penau dalam dagang.
“Mekanisme disediaka perintah ti meri awak ungkup pemaik rayat, muka jalai ngagai sida ngatur gaya kuing pengidup diri empu.
“Ari pemisi runding ti positif sereta penau nempa pekara baru dalam pengidup, raban nembiak patut ransing agi gawa nyapai juluk ati sida.
“Nya kebuah kaul raban nembiak ba pengawa dagang nyadi singkang ti patut dipuji laban berani,” ku iya.
Iya mansutka jaku nya lebuh ngarika Sapit Kepala Menteri, Datuk Amar Douglas Uggah Embas bejaku bejadika Karnival Layar 2018 diatur di RTC Betong semak ditu, malam kemari.
Pia mega ku iya, pengawa ngatur Karnival Layar 2018 meri awak bedagang ngagai bala pedagang nambahka penatai pemisi sida.
“Aku pechaya raban nembiak bisi ati nambahka belanja ari kaul aktiviti bejual ti bisi diatur kelimpah nyereta bemacham program bisi dilis dalam karnival sekali tu,” ku iya.
Urung 15,000 pengusung datai ngulu program dua hari berunggu ke alai laman RTC Betong ti nyadi palan ngatur aktivit.
Bala pengusung mega bisi disediaka bemacham aktiviti bukai sereta barang ti bisi dijual sida ti bedagang.
Sama bisi datai chalun BN P.204 Betong, Robert Lawson Chuat, Penyandang Penemu Pemansik Sains Nengeri Sarawak, Datuk Patinggi Tan Sri Alfred Jabu Numpang, enggau bini iya, Dato Sri Empiang Jabu, Residen Bagi Menua Betong, Friday Belik, Ketuai Polis Pelilih Betong, DSP Mohamad Fahdil Antum Abdullah, bala ketuai opis sereta komuniti ke bukai.
Nya kebuah kaul raban nembiak ba pengawa dagang nyadi singkang ti patut dipuji laban berani. Gerald Rentap Jabu ADUN Layar