UPP mengkang parti politik ti ngatika kediri

KUCHING: Parti Rakyat Bersatu ( UPP) mengkang parti politik ngatika diri kelimpah enggau nyentuka sida nyapai sempekat begulai bekaul atur semaya begulaika iya enggau Parti Sa’ati Rayat Sarawak (SUPP).

Sekretariat Besai UPP nengah penerang berita kemari madahka UPP enggau SUPP agi berandauka pengawa begulaika kededua parti nya nengah siti Sempekat Pemereti Ati (MoU) ti disain dalam bulan Mac tu tadi.

Taja pia UPP madah, ketegal nyediaka diri napi Pengawa Bepilih Besai ke-14 (PRU14), kededua parti semina bisi awak ngatur randau tumu nengah Komiti Randau ti ditumbuh di baruh MoU nya.

Kelimpah sereta dataika kededua parti nyapai sempekat begulai bekaul enggau atur semaya begulai, UPP deka chakah gawa nyadi parti politik ti ngatika diri.

“UPP Besai deka nerang, parti nya mengkang nyadi parti politik ti ngatika diri, rejista enggau Opis Pengerejister Gerempung (ROS).

“Kami ngansak ngambika semua ketuai enggau kaban UPP terus gawaka rayat sereta nyukung semua aktiviti parti.

“Kami andal semua Pampang UPP deka seruran gawa memanah pulaika pemaik parti enggau semua kaban iya,” ku UPP.

Penerang tu dikeluar ngelansa ripot Utusan Borneo kemari, ti bisi nyebut Kepala Menteri Datuk Patinggi Abang Johari Tun Openg mansutka jaku SUPP udah begempung lalu nadai agi UPP.

Nya kebuah iya enggai agi meda komuniti China di nengeri tu charut enggau pangan diri lalu awak ngagai komuniti China mantaika sida udah beserakup.

“Enti enda beserakup, raban bukai deka beambi ulih ba pengelemi kitai.

“Kita ( komuniti China) ukai bansa datai, kita peranak Sarawak lalu kitai udah lama gawa begulai. Nya alai, nama kebuah deka belaya?.

“Pengudah komuniti China beserakup, kita deka nyadi sebagi ari perintah,” ku iya lebuh bejaku bejadika Program Sejiwa Senada di MJC, ditu, apin lama ke udah.