Balai mayuhguna Kpg Bletih ke beungkus RM3 juta udah dipenyadi

KAPIT: Balai mayuhguna Kampung Bletih beungkus RM3 juta ditu udah dipenyadi pemangku Sapit Menteri Pemansang Menua Pesisir enggau Kandang Menua Datuk Alexander Nanta Linggi kena lemai Hari Dua rambau atur program gempuru Pemesai Begulai Enggau Rayat.

“Kitai meri terima kasih ngagai perintah laban ngelama tu udah bejalaika mayuh macham projek di genturung pendiau kitai ditu. Kitai meri terima kasih ngagai Nanta laban udah nangkup peminta kitai di renggat baruh,” ku Pemancha Haji Wasli Nor.

Wasli ngerintai antara projek udah dipejalai nyengkaum ngaga jematan besi beungkus RM3 juta meraka Sungai Kapit benung digaga, ti nyam- bung Kampong Muhibbah Bletih enggau Kampong Baru ditu. Jematan nya deka mai peranak dia diau begulai semak agi.

Tiga projek dinding tekat tebing sungai digaga ngambika tanah enda tusur di sepanjai Batang Rajang.

Iya mega meri terima kasih ngagai Opis Menteri Pemansang Menua Pesisir enggau Kandang Menua (KKLW) ti udah ngemendarka agih belanja dikena ngaga baru/ngemadaska bilik mandi enggau agi di Majlid Jabar An-Nur.

Haji Wasli minta peranak genturung pendiau nyadi tulang belakang Nanta enggau perintah.

Dulu agi ari nya rambau penatai iya, nanta ngemata pengawa mantaika seni ngetanka diri Melayu, Silat, diuluka pemenang midul emas SUKMA 2016, Oliva Chong enggau tim iya.

Batang pengerami lemai nya Nanta bejadika Balai mayuhguna pengudah iya dipebasa nyain plak.

Sekretari Politik Kepala Menteri Sarawak Tapa Ata, Chairperson Pemansang Raban Indu enggau Pengelantang Ruang Bilik Parlimen Kapit, Datin Angelina Celestine Ujang, Pemesai JASA Mohd Matan Yok, Kaunsilor Mohd Illahi Junaidi, Pemancha Haji Wasli Nor, Penghulu Haji Abang Hamzah Bolhassan, Ketuai Kampung Berawi Kasah antara peranak genturung pendiau nya bisi datai begempuru.