Hari Orang Indu enggau Pemansang Ruang Bilik ke diatur di Kapit mujur
KAPIT: Chairperson Raban Indu enggau Pemansang Ruang Bilik di sitak Parlimen Kapit, Datin Angelina Celestine Ujang berasai lantang ati meda timbal chukup manah sehari nyentuk program Hari Orang Indu enggau Pemansang Ruang Bilik Kapit diatur begulai Institut Indu Kapit, Sarakup Indu Dayak Sarawak (SIDS) Kapit enggau Serakup Indu China Kapit nyerumba Pengawa Ngintu Bulan Ruang Bilik Nasional 1Malaysia (BKK1M).
“Terubah iya kami nagit urung 500 iku pesereta indu ngulu program tu, tang lantang amat ati meda timbal chukup manah ke alai bisi 700 iku indu di menua tu datai ari bemacham kelab enggau serakup sereta biro indu ari Komiti Pemansang enggau Pengelikun Genturung Pendiau (JKKK),” ku Angelina dalam jaku dipansutka iya rambau atur program BKK1M diatur di Palan Sivik Kapit, apin lama ke udah.
Bisi datai bejadika program iya nya Kaban Kunsil Nengeri (ADUN) Bukit Goram, Jefferson Jamit Unyat.
Iya madahka antara tuju program nya deka meri fokus isu rama ngaul institusyen ruang bilik nyengkaum menyati anak, sarak, bebuaika anak mit, pengelikun anak, raban orang tuai, pengelinga apai indai enggau isu beleman.
“Isu pasal anak mega siti ari fokus kitai laban sida tu nyadi ketuai menua dudi hari sereta pejalai ‘Transformasi National – TN50’ udah dipejalai di baruh Opis Menteri Nembiak enggau Lumba Malaysia, ti nyadi siti ari inisiatif perintah nentuka raban nembiak diseridi sereta diembing memanah nuju kuing ti betul,” ku Angelina.
Iya nyemetak madahka bala nembiak ti nyulut tu suah agi datai ari embing apai indai ti diteladan laban ari institusyen ruang bilik ti tegap tau meri penegap ba pangka runding ngagai bala anak.
Ku iya nampung, pejalai pengawa dalam ruang bilik ti meruan ulih nulung nempa bala anak mansang besai ti bisi kualiti, kondusif sereta regas. Pemaik rampa institusyen ruang bilik udah mantu nerenakka pemanah ulah enggau disiplin ngagai bala anak.
Angelina ngingatka apai indai anang kelalu beririka bala anak sida enggau gajet ti mar rega baka telefon binching, tabletlaban tu ulih ngasuh kaul enggau diri sebilih meranggang lalu embing bala anak nampuk penemu lalu tu ngemai pangka besai ngagai sida ti mansang besai.
Ruang bilik ti lantang ku iya patut bisi lima pekara, KASIH, ti ngemai reti iya nya Kungkup ‘Kasih Sayang’ (pengasih enggau pengiruh), Aungkup Akhlak (nilai moral enggau pemanah ulah), Sungkup ‘ Sihat dan Sejahtera’ (Bepengerai Diau Lantang), Iungkup ‘Ilmu’ (Pelajar enggau Penemu) sereta Hungkup ‘Harmoni’ (Pemaik).
“Ruang bilik nadai pengasih enggau pengiruh tau ngasuh beserekang penemu ngagai sida sebilik. Taja pia, ruang bilik ti bisi pengasih enggau pengiruh deka nempa rebak ti ngembuan manah ulah, disiplin, bebatak asur enggau bebasaka pangan diri.
“Nya alai, raban indu meseti anang ngumbai diri empu menijar di rumah tang patut regas agi bejalaika pangku pengawa nyadi rebak dudi hari menua tu telampai ba jari sida ke indu,” ku iya.
Iya nyemetak madahka perintah mega chukup siru ngintu pengelantang raban indu di kandang menua pesisir ke alai beberapa polisi enggau agenda udah dilangkar sereta dipejalai dikena nangkup peminta sida nyengkaum kaul ba dagang enggau pekara dagang.
Ngelansa pasal program WOW enggau Hari Raban Indu, iya ngarapka bala pesereta ulih ngerebut awak nya ngulihka pemaik lalu bekunsika peneleba sida enggau bala bukai ti enda ulih ngulu program nya. Iya ngarapka program tu ulih nyediaka peluang ngagai raban indu berandau sereta ngerapitka tanggam kaul antara sida.
Iya mega minta raban indu terus ngintu pengerai diri. Nya kebuah program bekaul pengerai mega bisi diatur ungkup raban indu baka licha pasal riman servik enggau tusu ari Opis Pengerai. Riman servik enggau tusu tumu ditemu beguna amat dikena nyelamatka nyawa laban riman tu endang ditemu ulih munuh sida ke idnu,” ku iya seraya meransang sida beperesa pap smear bisi disedia komiti pengatur rambau atur program nya.
Direktor Kaunsil Peranak enggau Pemansang Ruang Bilik Nasional ( LPPKN), Rohani Ahmad mega bisi mansutka jaku nya rambau program nya.
Sama bisi datai Ketuai Kunsil Opis Pelilih Menua Kapit, Philimon Nuing, bini Jamit Nancy Kuyor, bini ADUN Pelagus, Seriah Thomas, Wilson Nyabong Ijang, speaker program, Kaunsilor Florince Christy, bala chairperson mayuh bansa gempung ukai dikuasa perintah enggau biro indu ari JKKK besemak sereta 700 iku bala pesereta ke bukai.