YSKL berengkah ngabas anak Sarawak ke belajar di universiti
KUCHING: Yayasan Sarawak nengah opis sida iya di Kuala Lumpur ( YSKL) berengkah ngabas chara berenggat ngagai universiti perintah ti bepun ari penemuai bala mahasiswa enggau mahasiswi anak Sarawak ke bisi belajar di Universiti Kebangsaan Malaysia (UKM) bedau lama tu tadi.
Atur pengawa nya dikemujurka begulai enggau Gerempung Mahasiswa Sarawak (PEMASRA) UKM lalu mujur ngempuruka urung 60 iku mensia mayuh ari bemacham kus sereta timpuh taun sida ke udah belajar dia.
Ba malam nya, Direktor Yayasan Sarawak, Azmi Bujang, temuai ti dibasa diasuh ngepunka ‘Malam Apresiasi Kenyalang Bersama Alumni (MAKBA) 2018’.
Sepiak sida iya kala ngeramika komiti PEMASRA sebedau tu lalu meri kelala mahasiswa anak Sarawak ke udah nyapai pemujur lebuh belaja ba UKM.
Azmi dalam jaku iya bisi meri penerang enggau silik agi bekait enggau skim mayar pelajar sereta mega bemacham bantu ke diberi Yayasan Sarawak ngagai anak Sarawak kelebih agi dalam meri belanja kena pelajar, bantu pelajar sereta mayuh utai bukai. Bala mahasiswa mega bepeluang tau nanya pasal Yayasan Sarawak ba randau tanya enggau saut.
Sebedau enggau ngulu program nya, Yayasan Sarawak mega bepeluang ngelawa bala nembiak Sarawak di Palan PERMATA Pintar Menua, alai ke semua sida tu dibayar ulih menua, baruh spunsa Biasiswa Program Pertukaran Pelajar Yayasan Sarawak (Zon Semenanjung Malaysia).
Atur pengawa berandau seretra belelak enggau 15 iku nembiak dikeramika agi enggau pengawa makai lemai begulai enggau bala nembiak dia, alai sida iya mega gaga endar ati bepeluang begempuru begulai enggau bala pengereja pengawa Yayasan Sarawak Opis di Kuala Lumpur.
Bala nembiak nya enda ngelepas peluang becherita pasal projek ke digaga sida sereta peneleba sida sepemanjai belajar di Palan PERMATA pintar Negara.
Yayasan Sarawak nengah YSKL deka majakka pengawa sida iya betemu sereta begulai enggau bala mahasiswa anak Sarawak di Universiti Perintah di serata menua Semenanjung Malaysia sepemanjang taun 2018 tu.
Bala mayuh ke deka nemu pasal pengawa Yayasan Sarawak enggau slik agi, sida iya ulih nalipaun Yayasan Sarawak Opis Kuala Lumpur ( YSKL) ba lumur telefon 03-4265 0619 tauka nengah emel ys@yayasansarawak. org.my.