Sistem GST semina ulih dikinsil nengah aum parlimen: Voon
KUCHING: Ketuai Bagi Orang Indu Pakatan Harapan ( PH) Voon Shiak Ni madah Sistem Chukai Barang enggau Servis (GST) ti ngeletak bayar 0 peratus berengkah 1 Jun tu semina ulih dikinsil ba aum parlimen.
Ku iya, seagi sistem chukai nya enda dikinsil nengah aum ba parlimen, GST nya mengkang ditulis ba resit.
“Tajapia nadai bayar dipinta ketegal tikas peratus bayar GST udah diubah perintah baru ke alai Pakatan Harapan netapka bayar 0 peratus, reti nya nadai bayar.
“Tikas peratus baru tu deka diterit dalam timpuh 2 minggu agi iya nya berengkah 1 Jun 2018,” ku Voon ba aum pengarang berita di Kuching kemari.
Iya ke mega Ketuai Orang Indu Parti Keadilan Rakyat( PKR) Sarawak madah pekara nya meseti diterang ketegal bisi sekeda orang mengkang enda mereti sentang ubah nya.
Ensanus Perintah Besai ke baru iya nya PH nengah Opis Menteri Pekara Wang netapka bayar GST diubah ari 6 ngagai 0 peratus berengkah 1 Jun.
Kemari, Opis Pekara Wang mega netapka Sistem Chukai Jual enggau Servis( SST) deka dikena baru nganti Sistem GST.
Sistem GST dituku perintah ke dulu ( Barisan Nasional) lalu dikemendar parlimen 3 taun ke udah.
Nitihka penerang Voon, PH dekaka rayat menua tu ngasaika pengelantang enggau naka pengelengkas.
“Ketegal nya PH nurunka peratus bayar GST ngagai 0 peratus iya nya nadai bayar sekali.
“Tang proses nginsil Sistem GST meseti diadu nengah aum parlimen,” ku iya.
Iya madah ba isu sekeda orang ke meli entukar enggau rumah ke alai sempekat dipesetuju sebedau 1 Jun 2018, sida mengkang mayar GST 6 peratus.